ახალციხეში საკონსტიტუციო ცვლილებების განხილვას გეგმავენ

შეხვედრა 14:00 საათზე, სამცხე–ჯავახეთის სახელმწიფო სასწავლო უნივერსიტეტის პირველი კორპუსშია დაგეგმილი.

საკონსტიტუციო ცვლილების პირველი პროექტი საქართველოს საკანონმდებლო ორგანოს ადგილსამყოფელს ეხება; ხოლო მეორე პროექტი – პრეზიდენტის უფლებამოსილებებს.

შეხვედრაზე საყოველთაო-სახალხო განხილვის საორგანიზაციო კომისიის წევრები საპარლამენტო უმრავლესობიდან, ოპოზიციური ფრაქციებიდან და არასამთავრობო ორგანიზაციებიდან დამსწრე საზოგადოებას საკონსტიტუციო ცვლილებების პროექტებს წარუდგენენ და საკუთარ მოსაზრებებს გააცნობენ. შეხვედრას მოქალაქეები და არასამთავრობო ორგანიზაციების, მედიისა და პოლიტიკური პარტიების წარმომადგენლები დაესწრებიან.

საკონსტიტუციო ცვლილებების ორი პროექტის საყოველთაო-სახალხო განხილვა საქართველოს პარლამენტმა დაიწყო. დისკუსიები უკვე გაიმართა: ზუგდიდში, ქუთაისში, თბილისში, ოზურგეთში, გორში, რუსთავსა და თელავში.

საკონსტიტუციო ცვლილებების საყოველთაო–სახალხო განხილვა ეროვნულ-დემოკრატიული ინსტიტუტის (NDI) ორგანიზებით ეწყობა.

[Sknews.ge]