ღარიბაშვილი: ჯავახეთში ვითარება კონტროლირებადია

„მერაბიშვილის გამოცდილება საერთოდ არ გვჭირდება. აქეთ გავუზიარებთ თუ ძალიან უნდა,“ - განაცხადა ირაკლი ღარიბაშვილმა საპარლამენტო უმცირესობასთან შეხვედრისას.

მისივე თქმით, ჯავახეთში კონტროლირებადი ვითარებაა: "ჯავახეთს რაც შეეხება, არავითარი ვითარება არ არის დაძაბული, ეს არის აბსოლუტურად გაზვიადებული და უპასუხისმგებლო განცხადებები. მე მოვუწოდებ ყველას, მათ შორის, იქნება ეს მერაბიშვილი, თუ უმცირესობის სხვა წარმომადგენელი, რომ მაქსიმალურად ფრთხილად მოეკიდონ ასეთ საკითხებს. არავითარი სიტუაცია არ არის დაძაბული, არის სრულად კონტროლირებადი".

შეგახსენებთ, 14 მარტის სხდომაზე ახალქალაქის მუნიციპალიტეტის საკრებულომ გადაწყვიტა საქართველოს პარლამენტს ევროპული ქარტიის მიღებისა და სომხური ენისთვის რეგიონული სტატუსის მინიჭების შესახებ მოწოდებით მიმართოს. ინიციატივა ფრაქცია ”ქართული ოცნება - რესპუბლიკელებს” ეკუთვნით.

”ნაციონალური მოძრაობის” გენერალურმა მდივანმა ვანო მერაბიშვილმა დღეს გამართულ ბრიფინგზე განაცხადა, რომ მათი მთავრობაში ყოფნის დროს, ჯავახეთი მას ებარა და მზად არის, ხელისუფლებას ამ საკითხში დახმარება გაუწიოს: ”მე მინდა შევთავაზო ხელისუფლებას გამოიყენოს ჩვენი გამოცდილება. მზად ვარ შევხვდე ნებისმიერ წარმომადგენელს და მივცე რჩევა, მივცე კონსულტაცია”.

[ნინო ნარიმანიშვილი, ახალციხე]