ვანო მერაბიშვილი: სტატუსის თემა ”ოცნების” პროვოცირებულია

ვანო მერაბიშვილმა ”ერთიანი ნაციონალური მოძრაობის” ოფისში დღეს გამართულ ბრიფინგზე განაცხადა, რომ მართალია ხელისუფლება ცდილობს თემის წამოწევა ”ნაციონალურ მოძრაობას” გადააბრალოს, მაგრამ, სინამდვილეში, საკითხი ”ქართული ოცნების” პროვოცირებულია: ”ცენტრალურმა ხელისუფლებამ მოსთხოვა ახალქალაქის გამგეობას დაეყენებინათ, მხარი დაეჭირათ საკონსტიტუციო ცვლილებებისთვის და თქვენ ახლა მოგეხსენებათ ვისი ინიციატივაა დღეს საკონსტიტუციო ცვლილებები. და, მინდა გითხრათ, რომ ახალქალაქში საზოგადოებივი აზრი არის ისეთი, რომ თუ ეს საკითხი დადგება დღის წესრიგში, ვერცერთი საკრებულოს წევრი ამის წინააღმდეგ ხმას ვერ მისცემს”.

მერაბიშვილმა განაცხადა, რომ ყველა ის ადამიანი, რომელიც ჯავახეთში ქართულ სახელმწიფოებრიობას პირდაპირ ან ირიბად უპირისპირდებოდა, "ნაციონალური მოძრაობის" ხელისუფლებამ სხვადასხვა ინსტიტუტების მუშაობაში ჩართო. დღეს კი ჯავახეთში ვითარება ოდნავ შეცვლილია და გაჩნდა სიტუაციის დაძაბვის პირველი ნიშნები. ეს კი გამოიწვია ”ნაციონალური მოძრაობის” აქტივისტების, იმ ადამიანების დევნამ, ვინც ამდენი წლის განმავლობაში ჯავახეთში სიტუაციის დარეგულირებას ცდილობდა და ასევე, ვაჰაგნ ჩხალიანის გამოშვებამა და ტოროსიანისთვის პერსონა ნონ-გრატას სტატუსის მოხსნამ.

”ჩვენ 9 წლის განმავლობაში ვაკეთებდით იმას, რომ ეს საკითხი დღის წესრიგში არ დამდგარიყო. დავით რსტაკიანი, რომელიც იყო საკმაოდ გავლენიანი ადამიანი, იყო წინა საკრებულოების წევრი, ყოველთვის აყენებდა ამ საკითხს საკრებულოს სხდომაზე და ამიტომ, ბოლო არჩევნებზე სხვა პოლიტიკურ პარტიებთან ერთად ყველაფერი გავაკეთეთ იმისთვის, რომ რასტაკიანი და მისი მსგავსი რადიკალები საკრებულოში არ მოხვედრილიყვნენ,“- აცხადებს მერაბიშვილი და აქვე ამატებს, - დღევანდელმა ხელისუფლებამ ციხიდან გამოუშვა და ლამის გმირად შერაცხა ჩახალიანი, ტოროსიანს მოუხსნა პერსონა ნონ-გრატას სტატუსი, და შესაბამისად, დაიწყო ბრძოლა”

ვანო მერაბიშვილმა განაცხადა, რომ მათი მთავრობაში ყოფნის დროს, ჯავახეთი მას ებარა და მზად არის, ხელისუფლებას ამ საკითხში დახმარება გაუწიოს: ”მე მინდა შევთავაზო ხელისუფლებას გამოიყენოს ჩვენი გამოცდილება. მზად ვარ შევხვდე ნებისმიერ წარმომადგენელს და მივცე რჩევა, მივცე კონსულტაცია”.

მერაბიშვილი ჯავახეთში მიმდინარე მოვლენებზე პასუხისმგებლობას ბოლომდე ”ქართულ ოცნებას” აკისრებს: ”ეს მცდელობა, დაბრალდეს ”ნაციონალურ მოძრაობას” არის უსუსური, რადგან ყველა შემთხვევაში, რაც ხდება ჯავახეთში, პასუხისმგებლობა ეკისრება ხელისუფლებას”

”კიდევ ერთხელ მინდა ვუთხრა ხელისუფლებას, ”ნაციონალური მოძრაობის” წინააღმდეგ ბრძოლას ნუ გადააყოლებს ჩვენი ქვეყნის სტაბილურობას”, - განაცხადა მერაბიშვილმა.

[ნინო ნარიმანიშვილი, ახალციხე]