ცისკარიშვილი ჯავახეთში ენის საკითხის წამოწევას ”ნაციონალების” პროვოკაციად აფასებს

ცისკარიშვილი აცხადებს, რომ ახალქალაქის მუნიციპალიტეტის საკრებულოს მიერ მიღებული რეზოლუცია, რომლის საფუძველზეც პარლამენტს რეგიონული ენის სტატუსის მინიჭების თხოვნით მიმართავენ, არაგონივრულ დროსაა წამოყენებული.

”ადრე ჯავახეთში დაპირისპირება მხოლოდ რუსეთის გეგმა იყო, ახლა ვფიქრობ, რომ ”ნაციონალური მოძრაობაც” კმაყოფილი იქნება თუ რეგიონში ურთიერთობა დაიძაბება, - განაცხადა ცისკარიშვილმა ”სამხრეთის კარიბჭესთან” სატელეფონო საუბრისას, - არ გამოვრიცხავ ეს იყოს ყოფილი ხელისუფლების მორიგი პროვოკაცია, ასევე მცდელობა იმისა, რომ დღევანდელი ხელისუფლება გამოიყვანონ უმცირესობების უფლებათა დამრღვევად”.

ცისკარიშვილის თქმით, ამ ფონზე ასევე პროვოკაციის თემად შეიძლება იქნეს გამოყენებული ვაჰაგნ ჩახალიანის თემაც. ამიტომ იგი ადგილობრივ მოსახლეობას ურჩევს, მკაფიოდ დაასახელონ ამ ინიციატივის ავტორების სახელები და გვარები.

”რეგიონული ენის სტატუსი საქართველოს პირობებში განსაკუთრებული მიდგომის თემაა, რადგან ახლა რეგიონული პოლიტიკაც იცვლება და რეგიონებში შემავალი მუნიციპალიტეტების რუქაც”, - აცხადებს ცისკარიშვილი.

მისი თქმით, ნებისმიერი ენის მფლობელი საზოგადოება უნდა იყოს დარწმუნებული იმაში, რომ მშობლიური ენის გამოყენება არ იქნება შეზღუდული უპირველეს ყოვლისა კულტურულ და საგანმანათებლო სფეროში.

”რაც შეეხება სახელმწიფო ენად ქცევის ვალდებულებას, ასეთი ვალდებულება ამ საკითხს არ გააჩნია. თუ დავიწყებთ სომხურ, ოსურ, აზერბაიჯანულ, მეგრულ, სვანურ და თუშურ ან სხვა ენებზე რაიმე ტიპის სახელმწიფოებრივ საქმიანობას, ეს გამოაცლის საფუძველს მთლიანად ქართულ სახელმწიფოს. ამიტომ რასაკვირველია, მშობლიური ენის შესწავლის საშუალება უნდა ჰქონდეს ახალგაზრდა თაობას და ამის შემდეგ, უნდა დავუთმოთ საკუთარი უფლება სახელმწიფოს, რომ სახელმწიფო ენის სტატუსი მკაფიოდ გამოხატოს და გამოიყენოს იგი სახელმწიფო სისტემაში ერთადერთ საურთიერთობო ენად”.

შეგახსენებთ, 14 მარტის სხდომაზე ახალქალაქის მუნიციპალიტეტის საკრებულომ გადაწყვიტა საქართველოს პარლამენტს ევროპული ქარტიის მიღებისა და სომხური ენისთვის რეგიონული სტატუსის მინიჭების შესახებ მოწოდებით მიმართოს. ინიციატივა ფრაქცია ”ქართული ოცნება - რესპუბლიკელებს” ეკუთვნით. საკრებულოს დეპუტატები აცხადებენ, რომ საკითხი წლების წინაც განიხილებოდა, თუმცა არასოდეს მიდიოდა ადრესატამდე.

[თამუნა უჩიძე, ახალციხე]