ახალქალაქის საკრებულოს დეპუტატების თქმით, ენის სტატუსის საკითხი პირველად არ დასმულა

მართალია, ახალქალაქის მუნიციპალიტეტის საკრებულოს 14 მარტის სხდომას დეპუტატებმა ისტორიული უწოდეს, მაგრამ ბევრმა მათგანმა თავის გამოსვლაში განაცხადა, რომ ეს საკითხი პირველად არ დასმულა. მათივე განცხადებით, ადგილობრივ ხელისუფლებას ის არაერთხელ განუხილია და წარუდგენია კიდეც.

”აგრარული” ფრაქციის წარმომადგენელს მერუჟან ეზოიანს ამ საკითხთან დაკავშირებით გარკვეული შიში აქვს. ეზოანი ფიქრობს, რამდენად სწორად შეარჩიეს დრო საკითხის წამოსაწევად.

„ბოლო ხანებში პრეზიდენტის მხრიდან გაჟღერდა განცხადებები, რომ ახალქალაქში გაჩნდა სეპარატიზმი. ნუთუ ახლა ამ საკითხის დასასმელად შესაფერისი დროა? იქნებ ამ ნაბიჯით ენის საკითხი საერთოდ დავიწყებას მივცეთ. ვშიშობ, სწორი დროა თუ არა ახლა ამისთვის?! ამ ქმედებაში პოლიტიკური პიარის ელემენტები ხომ არ იმალება და ზოგმა ეს თავისი პოლიტიკური მიზნებისთვის ხომ არ უნდა გამოიყენოს?“ - ამბობს იგი.

რაიონული საავადმყოფოს დირექტორი და ფრაქცია „რესპუბლიკელების“ წევრი ალექსანდრე ტოროიანი ეზოიანის ეჭვს იზიარებს: „რასაკვირველია, არის ობიექტური და სუბიექტური მიზეზები. თუ შევხედავთ, ყოფილი ხელისუფლების დროს ამ საკითხის ამ ტრიბუნიდან განხილვა იყო თუ არა შესაძლებელი, დავინახავთ, რომ რასაკვირველია, არ იყო. იყო მითქმა-მოთქმა, ხელმოწერების შეგროვება, მაგრამ ასეთი განხილვა არ ჩატარებულა, რადგან არ უშვებდნენ“.

საკრებულოს დეპუტატი ფიოდორ ტოროსიანი ამბობს, რომ ენის საკითხთან დაკავშირებით გადაწყვეტილებები ადრეც იყო მიღებული, მაგრამ მათ ადრესატამდე არ მიუღწევია.

„წინა გადაწყვეტილებებს დანიშნულების პუნქტამდე არ მიუღწევია, რადგან მას საკრებულოსა და გამგეობის თავმჯდომარეების ხელმოწერები არ ქონდა. არც ადრეა და არც გვიან, ენის საკითხი ყოველთვის აქტუალურია, რადგან ეს ჩვენი ეროვნული იდენტურობისთვის უმნიშვნელოვანესი საკითხია“, - ამბობს იგი.

საზოგადოებისთვის უცნობია, რა სახის განხილვები ტარდებოდა ენის საკითხზე თვითმმართველობის ადგილობრივ ორგანოებში, სადამდე მიდიოდა ეს წინადადებები და რატომ არ ხდებოდა მათზე რეაგირება. იმ დროს, როდესაც სომხური ენის სტატუსის საკითხის დასმა „დანაშაულის“ ტოლფასი იყო, სომხური საზოგადოებრივი ორგანიზაციების საბჭო ამ საკითხს როგორც საქართველოს, ისე ევროპის სხვადასხვა ინსტანციებში სვამდა.

ახალქალაქის მუნიციპალიტეტის საკრებულოს დეპუტატებმა, რომლებიც სხდომას ესწრებოდნენ, პარლამენტისთვის მიმართვას მხარი ერთხმად დაუჭირეს და „რესპუბლიკელების“ ინიციატივას აპლოდისმენტებით შეხვდნენ. ამ ეტაპზე დეპუტატები პარლამენტში გასაგზავნი განცხადების საბოლოო ვარიანტის შემუშავებაზე მუშაობენ.

შეგახსენებთ, 14 მარტის სხდომაზე ახალქალაქის მუნიციპალიტეტის საკრებულომ გადაწყვიტა საქართველოს პარლამენტს ევროპული ქარტიის რატიფიცირების შესახებ მოწოდებით მიმართოს. ინიციატივა ფრაქცია ”ქართული ოცნება - რესპუბლიკელებს” ეკუთვნით.

[აღუნიკ აივაზიანი, ახალქალაქი]