საყუნეთსა და ოთაში მეჩეთების რეაბილიტაცია იგეგმება

საყუნეთის მეჩეთი
კულტურული მემკვიდრეობის დაცვის ეროვნული სააგენტოს ხელმძღვანელის ნიკოლოზ ანთიძის განმარტებით, პირველ ეტაპზე რეაბილიტაციისთვის ის მეჩეთები შეირჩა, რომლებსაც შედარებით ნაკლები თანხა სჭირდება. რეაბილიტაცია ჩაუტარდება ახალციხის, სოფელ საყუნეთის და ასპინძის სოფელ ოთის მეჩეთებს.

„ვიწყებთ იმ მეჩეთების რეაბილიტაციას, რომლებსაც ნაკლები პრობლემები აქვს, რათა სხვა დანარჩენივით სავალალო შედეგებამდე არ მივიდეს. მაგალითად როგორცაა ზიკილიაში, ამ მეჩეთის რეაბილიტაციას, გაცილებით მეტი თანხის მოძიება სჭირდება“, – განაცხადა ნიკოლოზ ანთიძემ.
მისივე თქმით, საპროექტო–სახარჯთაღრიცხვო დოკუმენტაციის მომზადების შემდეგ, მეჩეთების რეაბილიტაცია შესაძლებელია წელსვე დაიწყოს.

საყუნეთისა და ოთის მეჩეთების მსგავსად, მესხეთში რეაბილიტაციას არაერთი კულტურული მემკვიდრეობის ძეგლი საჭიროებს, რომლის ნაწილსაც ადგილობრივები სათავსოებად იყენებენ. „სამხრეთის კარიბჭემ“ ამ თემაზე მასალა 2017 წლის თებერვალში მოამზადა სახელწოდებით „სათავსოებად ქცეული სალოცავები“.

მასალის გამოქვეყნების შემდეგ კულტურული მემკვიდრეობის სააგენტომ მეჩეთების საკითხის შესწავლა დაიწყო. საქმე ეხება ნაქურდევის, ზიკილიის და საყუნეთის მეჩეთებს, რომლებშიც ადგილობრივებს თივა, მატყლი და სხვადასხვა საყოფაცხოვრებო ნივთები აქვთ შენახული.

ვარძიის მუზეუმ–ნაკრძალის მმართველი კახა ზაზაძე აცხადებდა, რომ ადგილობრივებს მეჩეთებიდან შეტანილ ნივთებს გამოატანინებდნენ და დაასუფთავებინებდნენ, თუმცა მოგვიანებით კულტურული მემკვიდრეობის დაცვის ეროვნული სააგენტოში ამ პროცესზე უარი თქვეს.

„თუ მეჩეთებს ადგილობრივები გაწმენდენ, საფრთხილოა, შეიძლება ისეთი ნივთი იყოს ჩამოგდებული, რომელიც ღირებულია და პროექტირების პროცესში დაგვჭირდება, ამიტომ ჩვენები უახლოეს პერიოდში პირველადი მონაცემების ასაღებად ჩამოვლენ, პროექტირების დეტალების დასაზუსტებლად. რესტავრაციის პროცესის დროს კი გაიწმინდება. რეაბილიტირებულ შენობას ადგილობრივები ჩაიბარებენ და მიხედავენ კიდევაც“, – განმარტავს ნიკოლოზ ანთიძე.

რაც შეეხება ზიკილიის და ნაქურდევის მეჩეთებს კულტურული მემკვიდრეობის დაცვის ეროვნული სააგენტოში პასუხის გაცემა უჭირთ:“შესაწვლის საგანია და ერთ და ორ დღეში პასუხს ვერ გაგცემთ, გამომდიანრე იქიდან, რომ მას სჭირდება სრულფასოვანი კვლევა“, – განაცხადა ნიკოლოზ ანთიძემ.

მისივე თქმით, საგენტოში ცდილობენ ფონდების და არასამთავრობო ორგანიზაციების მოძიებას, რომლებიც დაზიანებული ძეგლების რეაბილიტაციაში დაეხმარებიან:“რამდენიმე ორგანიზაციამ გამოთქვა სურვილ თანამშრომლობის, ჩვენ ერთობლივად მივიღებთ გადაწყვეტილებას“.


ოთას ჯამე.ფოტო: © ქართული ისლამური კულტურული მემკვიდრეობა


ოთას ჯამე.ფოტო: © ქართული ისლამური კულტურული მემკვიდრეობა


საყუნეთის მეჩეთი

[თინათინ ზაზაძე, ახალციხე]