"აღადგინე ბორჯომის ტყე" – მასშტაბური კამპანია დაიწყო

კამპანიის "აღადგინე ბორჯომის ტყე" ინიციატორი "ბიზნეს ინფორმაციის სააგენტოა"(ბია) მისი ორგანიზებით, ტყის სრული რეაბილიტაციისთვის, ქართული კომპანიების გაერთიანება იგეგმება.

ბორჯომის ტყის ტერიტორიაზე ხის დარგვა ნებისმიერ მსურველს კამპანიისთვის სპეციალურად შექმნილი ვებ–გვერდის საშუალებით შეუძლია. ვებ – გვერდზე - aghadgine.ge მომხმარებელი თავად ირჩევს რამდენი ხის დარგვა სურს.

ხის დარგვა შესაძლებელია როგორც კომპანიის, ისე ფიზიკური პირის სახელით. კამპანიის ფარგლებში, მომხმარებელს საშუალება აქვს თვალი ადევნოს პროცესს და ყოველდღიურად ვებ-გვერდზე გადაამოწმოს, რამდენი ხე დაირგო და რამდენი დარჩა ტყის სრულად აღსადგენად.

"აღადგინე ბორჯომის ტყე" კამპანიის ორგანიზატორების ინფორმაციით, ბორჯომის ეროვნული პარკის ტერიტორიაზე 2008 წელს გაჩენილი ხანძრის შედეგად, 250-მდე ჰექტარზე ტყის საფარი მთლიანად განადგურდა. განადგურებული ტყე კლასიფიკაციის მიხედვით განეკუთვნებოდა უნიკალურ, განსაკუთრებული ფუნქციური დანიშნულების ტყეს, რომლის არსებობა განაპირობებს რეგიონში ეკოლოგიური წონასწორობის შენარჩუნებასა და ეკონომიკურ-სოციალურ განვითარებას.

წლების შემდეგ, ეკოლოგიური მდგომარეობა კიდევ უფრო დამძიმებულია, ვერ ხერხდება დაზიანებული უბნების ბუნებრივი განახლება, დამძიმებულია ეროზიული ფონი. ტერიტორიაზე საერთაშორისო და ადგილობრივი ექსპერტების მიერ ჩატარებული კვლევების შედეგად, მდგომარეობა შეფასდა როგორც ეკოლოგიური კატასტროფა. კვლევების მიხედვით, ტყის აღდგენის პროცესში ჩარევის გარეშე, ის ვეღარასდროს დაუბრუნდება პირვანდელ სახეს.

ბორჯომის ეროვნული პარკი ერთ-ერთი უდიდესი პარკია ევროპაში. ტერიტორია ყოველთვის გამოირჩეოდა იშვიათი სახეობის ხეებით და უნიკალური მცენარეებით. პარკის ტერიტორიაზე ბინადრობს "წითელ ნუსხაში" შესული ცხოველების 8 სახეობა.

[sknews.ge]