ბორჯომის ხეობაში ტყის აღდგენა დაიწყო

ბორჯომის ხეობაში, სოფელ დაბაში ტყის აღდგენითი სამუშაოები დღეს, 12 ოქტომბერს დაიწყო.

სამინისტროს ინფორმაციით, სოფელ დაბის მიმდებარე ტერიტორიაზე სატყეო სააგენტოს სანერგეებში გამოყვანილი 4000-მდე წიწვოვანი სახეობის ნერგი დაირგო. ტყის აღდგენის სამუშაოებში ჩართულია ადგილობრივი მოსახელობა. მიმდინარე წლის ოქტომბერ-ნოემბერში ტყის აღდგენა 144 ჰექტარზე იგეგმება, სადაც, დაახლოებით, 400 000-მდე ნერგი დაირგვება. დარგვის პროცესი მეტყევე-სპეციალისტების ზედამხედველობით განხორციელდება.

ბორჯომის ხეობაში ხანძრისგან განადგურებული ტყის პერიმეტრი 943 ჰექტარს შეადგენს. პირველ ეტაპზე (2018-2019 წლები) აღდგენას 250 ჰა ფართობი ექვემდებარება.

როგორც, გარემოს დაცვისა და სოფლის მეურნეობის სამინისტროში ამბობენ, გასულ წელს, ნახანძრალ ტერიტორიაზე კომპლექსური შესწავლები, მათ შორის, გეოლოგიური და ნიადაგის ლაბორატორიული კვლევა განხორციელდა. შედეგებზე დაყრდნობით და ადგილზე განხორციელებული საველე მონიტორინგის საფუძველზე, ეროვნული სატყეო სააგენტოს სპეციალისტებმა ტყის აღდგენის პროექტი მოამზადეს. პროექტის ძირითადი მიზანი ხეობაში პირვანდელი ტყის ეკოსისტემის აღდგენაა, რისთვისაც მხოლოდ ადგილობრივი, სტანდარტული ნერგი გამოიყენება. ტყის აღდგენისთვის ეროვნულ საშენ მეურნეობაში გამოყვანილი კონტეინერული ნერგის გამოყენებაც ხდება.

დღეს, მინისტრის მოადგილესთან და ადგილობრივი თვითმმართველობის წარმომადგენლებთან ერთად, ტყის აღდგენის სამუშაოებში მონაწილეობა ახალციხის პროფესიული კოლეჯის „ოპიზარი“ სატყეო საქმის სტუდენტებმაც მიიღეს.

ბორჯომის ხეობაში, ტყის აღდგენის სამუშაოების მეორე ეტაპი 2019 წლის გაზაფხულზე განახლდება.

[sknews.ge]