აგიტ მირზოევი: ”სომხური ენის სტატუსის საკითხზე მსჯელობა უნდა დაიწყოს”

”მიმაჩნია, რომ სომხური ენისთვის რეგიონული ენის სტატუსის მინიჭება სამცხე-ჯავახეთის რეგიონში აქტუალური თემაა. მაგრამ, ამ საკითხის მიღება ფორსირებულად და საზოგადოებრივი დისკუსიის, ექსპერტების და პოლიტიკოსების მსჯელობის გარეშე მხოლოდ ზიანს მიაყენებს პროცესს და ქართულ-სომხურ ურთიერთობებს, ვინაიდან საქართველოს მკვიდრი მოსახლეობის ნაწილში არაერთგვაროვანი დამოკიდებულებაა ამ საკითხთან დაკავშირებით”, - ამბობს იგი.

მისივე თქმით, მნიშვნელოვანია, რომ საზოგადოებას და გადაწყვეტილების მიმღებ პირებს კარგად ესმოდეთ რას ნიშნავს რეგიონული ენის სტატუსი, და რა შედეგი შეიძლება დადგეს მისი აღიარებით: ”ჩემი აზრით, ამ ეტაპზე უპრიანი იქნებოდა არა რეგიონული ენის სტატუსის მოთხოვნა, არამედ სომხური ენის მიღება საქმის წარმოების ენად სამცხე ჯავახეთში, რაც ეფუძნება საქართველოს მიერ უკვე რატიფიცირებულ ევროპის საბჭოს ჩარჩო კონვენციის (FCNM) მე-10 მუხლს. ინფორმაციისთვის კი დავამატებდი რომ მათ, ვინც ხშირად დავდივართ რეგიონში, ზუსტად ვიცით, რომ ძირითადად ისედაც სომხურ ენაზე მიმდინარეობს ისეთი მნიშვნელოვანი პროცედურები, როგორიცაა მუნიციპალური სხდომები, კომუნიკაცია და ა.შ”.

აგიტ მირზოევი ამბობს, რომ ეთნიკური სომხების მოთხოვნა რომ სამართლიანია, სადაო საკითხი არ არის, თუმცა, მისი რეალიზებისთვის დროის სწორად შერჩევა, კარგად ორგანიზებული საინფორმაციო კამპანია, საზოგადოებრივი დისკურსი და საერთაშორისო ინსტიტუტების ჩართულობაა საჭირო.

შეგახსენებთ, 14 მარტს, ახალქალაქის საკრებულოს სხდომაზე, დეპუტატებმა გადაწყვიტეს პარლამენტს ”რეგიონული და უმცირესობათა ენის შესახებ ევროპული ქარტიის” რატიფიკაციის მოთხოვნით მიმართონ. საკრებულოში პარლამენტში გასაგზავნ ტექსტზე მუშაობა დაწყებულია.

[Sknews.ge]