არჩევნებიდან 5 თვეში ახალციხეს მეორე გამგებლის მოვალეობის შემსრულებელი ჰყავს [Video]

საკრებულოს დეპუტატებიდან გამგებლის მოვალეობის შემსრულებლის დანიშვნა მხოლოდ ყოფიმა საკრებულოს თავმჯდომარემ, მალხაზ გიქოშვილმა გააპროტესტა

”ასე ყოველ სამ თვეში ცვალოთ გამგებელი?! ერთი რამე მაინტერესებს, ჩვენ პირად სარგებლობაზე ვართ აწყობილი, თუ ხალხზე უნდა ვიზრუნოთ?! მოვა ახალი გამგებელი, სამი თვე იმუშავებს და წავა. მერე კიდევ ახალი მოვა და ასე შემდეგ. შემოვდივარ წინადადებით, როგორც რიგითი დეპუტატი, რომ ჩავატაროთ კონკურსი. არსებობს მოადგილე და დროებით მან შეასრულოს გამგებლის მოვალეობა. მანამდე დეპუტატები დავსხდეთ და საკონკურსო პირობები ჩამოვაყალიბოთ”, - განაცხადა მალხაზ გიქოშვილმა და პროტესტის ნიშნად საკრებულოს სხდომა დატოვა.



”როგორც საკრებულოს თავმჯდომარეს, მაქვს სრული უფლება, წამოვაყენო ნებისმიერი კანდიდატურა. შესაბამისად, ვიდრე საკონკურსო კომისია შეიქმნება, დროებით მოვალეობის შემსრულებლად ბესიკ ბლიაძეს ვასახელებ”, - განაცხადა ახალციხის მუნიციპალიტეტის საკრებულოს თავმჯდომარემ ოლეგ სანდროშვილმა. [სანდროშვილმა მალხაზ გიქოშვილი საკრებულოს თავმჯდომარის პოსტზე 9 ნოემბერს ჩაანაცვლა].

მისივე თქმით, ბესიკ ბლიაძე აღნიშნულ თანამდებობაზე კონკურსის ჩატარებამდე დარჩება. რამდენ ხანს გაგრძელდება აღნიშნული პროცესი საკრებულოს თავმჯდომარე ვერ აკონკრეტებს: ”საკრებულოს წინა სხდომაზე საკონკურსო წესდება დავამტკიცეთ. მაგრამ, ეს დოკუმენტი იუსტიციის სამინისტროში გატარებას და შესაბამის იურიდიულ პროცედურებს საჭიროებს. კომისიის წესდება აღნიშნული პროცედურების შემდეგ დამტკიცდება, შესაბამისად ჩამოყალიბდება საკონკურსო-საატესტაციო კომისიაც, რის შემდგომაც ყველა საჯარო მოხელის დანიშვნა კონკურსის წესით მოხდება”.

[თამარ თოთაძე, ახალციხე]