ეთნიკური უმცირესობის წარმომადგენელი სტუდენტებისთვის სტაჟირების პროგრამა დაიწყო

მსურველებს პროგრამის შესახებ დეტალური ინფორმაცია ახალციხის უნივერსიტეტში, შერიგებისა და სამოქალაქო თანასწორობის საკითხებში სახელმწიფო მინისტრის აპარატის წარმომადგენლებმა გააცნეს.

„პროექტი 2017 წლიდან ხორციელდება და ეს უკვე მეორე მიღებაა. გაზაფხულის სესიაში 87 ადამიანი მონაწილეობდა. ვფიქრობთ, ეს ეთნიკური უმცირესობისთვის საზოგადოებაში სრული ინტეგრირების საუკეთესო საშუალებაა. გვაქვს ისეთი წარმატებული შემთხვევებიც, როდესაც სტაჟირების პროგრამის მონაწილეები შემდეგ სხვადასხვა უწყებებში დასაქმებულან,“ – ამბობს ელისო ლომიძე, სამოქალაქო ინტეგრაციის სამმართველოს უფროსი.

„ერთი წელი ქართულს ვსწავლობდი, შემდეგ პირველკურსელი გავხდი და ახლა სტაჟირების პროგრამაში მინდა მონაწილეობა. სოფელ დამალადან ვარ. ექვსი–შვიდი წლის წინ ყველა ერევანში მიდოდა სასწავლებლად, მას შემდეგ რაც „1+4“ პროგრამა გამოჩნდა, უმეტესად საქართველოში სწავლობენ, – გვეუბნება სამართლის მესამე კურსის სტუდენტი ესტელა ბაბოიანი.

ასია ანტონიანი, ახალციხის უნივერსიტეტის დაწყებითი განათლების მეოთხე კურსის სტუდენტი, ბორჯომის მუნიციპალიტეტის სოფელ ჭიხარულადანაა. სტაჟირების პროგრამა მისთვისაც დასაქმების კარგი საშუალებაა, – „ერთხელ უკვე ვიყავი ამ პროგრამის მონაწილე, ერთ–ერთ სკოლაში, ძირითადად ადმინისტრაციულ საკითხებს ვაგვარებდი დირექტორთან ერთად. ამაში „1+4“ პროგრამა დამეხმარა“.

სტაჟირების პროგრამაში მონაწილეობისათვის მსურველებმა განაცხადის ფორმა 22 ოქტომბრამდე უნდა შეავსონ. სტაჟირების პროგრამა „ქართულ ენაში მომზადების საგანმანათლებლო პროგრამით“ (1+4 პროგრამით) მოსარგებლე 500 სტუდენტზეა გათვლილი.

„ქართულ ენაში მომზადების საგანმანათლებლო პროგრამა“ ეთნიკური უმცირესობებისთვის უმაღლესი განათლების მიღების ხელშეწყობის მიზნით 2010 წელს დაიწყო. მონაწილე სტუდენტი ერთი წელი ქართულ ენის კურსს გადის, შემდეგ კი 4 წელი ბაკალავრიატზე სწავლობს. სწორედ ამის გამო უწოდებენ პროგრამას „1+4“-ს.



[ავთო ინასარიძე, ახალციხე]