ყოფილი პოლიტპატიმრები ახალციხეში

ყოფილი პოლიტპატიმრები მოქალაქეებთან შეხვედრებს მთელი საქართველოს მასშტაბით მართავენ. მუნიციპალიტეტის ადმინისტრაციულ შენობასთან დღეს ახალციხელებს შეხვდნენ და სამომავლო გეგმებზე ისაუბრეს.

”გვაინტერესებდა საერთო სიტუაცია და ძალიან კმაყოფილები ვართ. ვანო მერაბიშვილის ასე ნაქები მხარე, რომელიც ვითომდა მთლიანად ჰყავდა თავის კონტროლის ქვეშ, რეჟიმისგან გათავისუფლდა. დღეს შევხვდით ამ რეჟიმით დაზარალებულ მოსახლეობას, ვისაუბრეთ და გარკვეული მიზნები დავსახეთ”, - ამბობს უფლებადამცველი მელორ ვაჩნაძე.

დღევანდელ შეხვედრაზე პოლიტპატიმართა ყრილობაც დააანონსეს, რომელიც 14 აპრილს, 14:00 საათზე სპორტის სასახლეში გაიმართება. მელორ ვაჩნაძის თქმით, ყრილობაზე გარკვეული მესიჯები გაკეთდება, როგორც ახალი ხელისუფლების, ასევე უცხოელი დიპლომატების მიმართ.

- ”გვინდა, რომ სამართლიანობა აღდგეს და ”ნაციონალური მოძრაობა” კანონის სრული დაცვით გასამართლდეს როგორც რეჟიმი და დამნაშავე ორგანიზაცია”, - განაცხადა მელორ ვაჩნაძემ.

ყოფილი პოლიტპატიმრის ზურაბ ხუციშვილის თქმით, იგი თავისუფალი სიტყვის გამო გაასამართლეს.

”როცა ადამიანი მოინანიებს და ამას დაგვანახებს შეიძლება იმას შეუნდო, მაგრამ თუ არ ინანიებს და აქეთ ”გაწვება”, რომ დამნაშავე ხარო იმას როგორ უნდა შეუნდო. ადამიანს არ ეპატიება, ენის, მამულის და სარწმუნოების გაყიდვა, რაც ”ნაციონალებმა” გააკეთეს”, - ამბობს ზურაბ ხუციშვილი.

ყოფილი პოლიტპატიმრების თქმით, 14 აპრილს სააკაშვილის 9 წლიანი მმართველობის პერიოდში არსებული რეჟიმის შედეგად რეპრესირებული მოქალაქეები შეიკრიბებიან.

- ”რათა ამ ადამიანებმა, თავიანთი პოზიცია გამოხატონ იმ ცხრა წლის მიმართ, რამაც ძალიან დიდი ტკივილი მიაყენა მათ. ფაქტობრივად მთელი საქართველო საკონცენტრაციო ბანაკად იყო გადაქცეული. დღეს კი ხალხი იმ რეჟიმისაგან გათავისუფლდა და ადამიანებთან თავისუფლად საუბარი შეიძლება”, - ამბობს მალხაზ ჟუჟუნაძე.

ყოფილი პოლიტპატიმრები ხელმოწერების შეგროვებასაც აპირებენ.

- ”ჩვენ დავურიგეთ სპეციალური ბლანკები, სადაც მოცემულია ის მოთხოვნები, რაც ჩვენ გვაქვს. ამ ხელმოწერებს გადავცემთ უცხოელ დიპლომატებს, ასევე პარლამენტს, სადაც ამის პრეზენტაცია მოხდება”, - ამბობს მელორ ვაჩნაძე.

ყოფილი პოლიტპატიმრები ახალციხეში ჩამოსვლას კიდევ გეგმავენ. რადგან 14 აპრილს ყრილობაზე დასწრების მსურველებს მოსაწვევები გადასცენ.



[თამარ თოთაძე, ახალციხე]