ყოფილმა პოლიტპატიმრებმა ახალციხეში აქცია გამართეს [Video]

ყოფილმა პოლიტპატიმრებმა აქცია მესხეთის სახელმწიფო დრამატული თეატრის დარბაზში გამართეს. იმისათვის, რომ სამართლიანობა აღდგეს და რეჟიმი გასამართლდეს ყოფილი პოლიტპატიმრები აქციებს მთელი საქართველოს მასშტაბით ატარებენ.

არასამთავრობო ორგანიზაციის ”ყოფილი პოლიტპატიმრები-ადამიანის უფლებებისათვის” თავმჯდომარის ნანა კაკაბაძის გაცხადებით სამცხე-ჯავახეთში წინა ხელისუფლების მიერ დამყარებული რეჟიმი განსაკუთრებით მკაცრად იყო გამოხატული.

”ჩვენ ვიცით, რომ ეს ადამიანები უფრო მეტად იყვნენ დასჯილნი და შევიწროვებულნი, ვიდრე სხვა რეგიონებში. ამიტომ გვინდა, რომ ისინი 14 აპრილს დაგეგმილ აქციაზე მივიწვიოთ და ყველამ ერთად ვუთხრათ ახალ ხელისუფლებას, რომ უარი ვთქვათ იმ რეჟიმზე, რომელიც ცხრა წლის განმავლობაში ამ ადამიანებს ავიწროვებდა და უფლებებს უზღუდავდა”, - განაცხადა ნანა კაკაბაძემ.

აქციის მონაწილეებს 14 აპრილს სპორტის სასახლეში დაგეგემილ ყრილობაზე დასასწრები მოსაწვევები დაურიგდათ.

”ამ ხალხს ჩვენ კიდევ ერთხელ შევახსენებთ, რომ 14 აპრილს სპორტის სასახლეში ვიკრიბებით, რათა ერთხელ და სამუდამოდ გავასამართლოთ ის უკანონო რეჟიმი, რაც ცხრა წლის განმავლობაში საქართველოში არსებობდა”, - ამბობს აქციის ერთ- ერთი ორგანიზატორი რატი მაისურაძე.

ყოფილმა პოლიტპატიმრებმა ახალციხის მოსახლეობასთან შეხვედრა 12 მარტსაც გამართეს.



[თამარ თოთაძე, ნინო ზედგინიძე, ახალციხე]