8 მარტის შეთანხმებაში პოლიტპატიმრები ნახსენები არ ყოფილა – კახა კალაძე

ჟურნალისტის რეპლიკაზე, რომ ოპოზიციის წარმომადგენლები საარჩევნო სისტემის ცვლილებასთან ერთად პოლიტპატიმრების გათავისუფლებას ითხოვენ, კალაძე ამბობს, რომ ეს საკითხი 8 მარტის შეთანხმებაში არ ყოფილა.

„8 მარტის შეთანხმებაში პოლიტპატიმრები ნახსენები არ ყოფილა და ეს ტექსტშიც არის ასახული. ნებისმიერ ადამიანს შეუძლია ეს წაიკითხოს და მოისმინოს ასევე ის განცხადებები, რას ამბობდნენ ჩვენი თანაგუნდელები შეხვედრამდე და შეხვედრის შემდეგ და რა განცხადებებს აკეთებდნენ ოპოზიციის წარმომადგენლები. შესაბამისად, ეს შეთანხმება ბუნებაში არ ყოფილა. ვერ იქნებოდა. შეთანხმება ხომ ის არის, როდესაც ადამიანები რაღაცაზე თანხმდებიან, ის უნდა იყოს შესრულებადი, როგორც ერთი, ასევე მეორე მხრიდან. შესაბამისად, ჩვენ ვერ ავიღებდით ისეთ პასუხისმგებლობას, რისი კომპეტენციაც ჩვენ არ გვქონდა“, - განაცხადა ინტერპრესნიუსთან კახა კალაძემ.

კალაძის თქმით, მისი გუნდი მზადაა მხარი დაუჭიროს ცვლილებებს: „ეს არის მნიშვნელოვანი შეთანხმება, რომელიც იქნა მიღწეული ელჩების ფასილიტაციის და ელჩების ჩართულობით. შესაბამისად, თუ ამას ოპოზიცია ჩააგდებს, რა თქმა უნდა, ეს იქნება მხოლოდ და მხოლოდ მათი პასუხისმგებლობა და მგონი, ადამიანები კარგად გააკეთებენ ანალიზს, თუ რატომ უნდა ოპოზიციას ამის ჩავარდნა და რატომ უნდა, რომ საარჩევნო სისტემის ცვლილება არ და ვერ განხორციელდეს“.

ევროკავშირის ელჩები და ამერიკელი სენატორები „ქართულ ოცნებას“ მოუწოდებენ, სრულად შესრულდეს 8 მარტს მიღწეული შეთანხმება, რომლის მიხედვითაც, 2020 წლის ოქტომბერში საპარლამენტო არჩევნები შერეული საარჩევნო სისტემით უნდა ჩატარდეს. სენატორები ასევე მიიჩნევენ, რომ საქართველში პოლიტიკური პატიმრები არიან და ისინი უნდა გათავისუფლდნენ.

[sknews.ge]