'ორბელიანი–საქართველომ' იდეების კონკურსის მესამე ეტაპი დაიწყო

იდეების კონკურსის შესახებ, „ორბელიანი საქართველოს“ წარმომადგენელმა, ასტამურ ჯიხაშვილმა, დღეს,17 იანვარს ახალციხეში შეხვედრა გამართა. დაინტერესებულ პირებს მან კონკურსის მთავარი თემატიკა და მიმართულებები გააცნო.

იდეების კონკურსი, სახელწოდებით „საქართველო ჩემი სახლია“ ორგანიზაცია „ორბელიანი საქართველომ“ 2016 წლის დეკემბრის თვეში გამოაცხადა. მის ფარგლებში ყველა დაინტერესებულმა პირმა, რომელსაც საკუთარი ინიციატივის განხორციელება სურს, განაცხადი ონლაინ, 2017 წლის იანვრის ბოლომდე უნდა შეავსოს.

ამ ეტაპზე ორგანიზაცია იმ ინიციტივებს შეარჩევს, რომლებიც რელიგიურ, ეთნიკურ და სექსუალური უმცირესობებს შეეხება.

მსურველებმა უნდა წარმოადგინონ იდეა, რომელიც ფოკუსირებული იქნება უმცირესობათა რომელიმე თემის პრობლემატიკაზე, შეავსონ აპლიკაცია ონლაინ-პლატფორმაზე www.app.orbeliani.net ქართულად, რუსულად ან ინგლისურად და დაასაბუთონ საკუთარი იდეის მნიშვნელობა შერჩეული თემისათვის, ასევე მიუთითონ ის ნივთები ან/და მომსახურება, რომლის შეძენაც აუცილებელია მათი ინიციატივის განხორციელებისათვის.

როგორც ორგანიზაციის წარმომადგენელი ასტამურ ჯიხაშვილი განმარტავს, კონკურსის ფარგლებში გამარჯვებული იდეის ავტორს ფულადი თანხა არ გადაეცემა. ორგანიზაციას ნივთებით დახმარება შეუძლია. ეს შეიძლება იყოს საკანცელარიო საგნები, ტექნიკა, ტრანსპორტირების უზრუნველყოფა და ა.შ.

"დაინტერესებულ პირს შეუძლია შევიდეს ჩვენს ონლაინ პლატფორმაზე– www.app.orbeliani.net და გადახედოს უკვე დაფინანსებული 9 პროექტის ბიუჯეტს. დაახლოებით იმავე ბიუჯეტის ფარგლებში მოხდება დაფინანსება, ამავე პლატფორმაზე მოხდება ონლაინ განაცხადის შევსებაც“, – ამბობს „ორბელიანი საქართველოს“ იდეების კონკურსის კოორდინატორი ასტამურ ჯიხაშვილი.

იდეების წარდგენის ბოლო ვადა იანვრის ბოლოა. შესული აპლიკაციებიდან გამარჯვებულს სპეციალურად შერჩეული კომისია დაასახელებს.



[თაკო ფეიქრიშვილი, ახალციხე]