‘მილიონიანი ფონდი’ახალგაზრდული ორგანიზაციების განვითარებისთვის - ვის შეუძლია გრანტის მოპოვება

კონკურსში მონაწილეობის მიღება შეუძლიათ მხოლოდ ისეთ ორგანიზაციებს, რომლებიც მუშაობენ ახალგაზრდული მიმართულებით. ასევე ახალგაზრდებს, რომლებიც შექმნიან ახალგაზრდულ ორგანიზაციას. აღნიშნულთან დაკავშირებით, საინფორმაციო შეხვედრა ახალციხის მუნიციპალიტეტის საკრებულოს შენობაში დღეს, 24 თებერვალს გაიმართა.

საკუნკურსოდ, ახალგაზრდულმა ორგანიზაციებმა გრძელვადიანი, განმეორებითი შედეგის მომტანი პროექტები უნდა წარადგინონ, რომელიც ხელს შეუწყობს ახალგაზრდების ჩართულობას საზოგადოებრივ, ეკონომიკურ თუ კულტურულ ცხოვრებაში.

საქართველოს მასშტაბით ასეთი 20–დან 30-მდე პროექტის დაფინანსება იგეგმება, რაც ჯამში მილიონი ლარის ღირებულების იქნება და ყველა რეგიონზე თანაბრად განაწილდება.

„თითოუელ რეგიონში დაფინანსდება 2-3 ახალგაზრდული ორგანიზაცია, ჯამში 90 000 ლარის ფარგლებში. მინიმალური ღირებულება პროექტის უნდა იყოს 30 000 ლარი. იმ შემთხვევაში, თუ წარმოდგენილი პროექტი იქნება 30 000 დან 60 000 მდე ღირებულების, განხორციელების ვადა იქნება 6 თვე. ხოლო 61 000 დან 90 000 მდე განსახორციელებელი პროექტის ვადა 10 თვეს არ უნდა აღემატებოდეს“, – ამბობს „ახალგაზრდობის სააგენტოს“ პროგრამული დეპარტამენტის თანამშრომელი, ნინო შეყლაშვილი.

საგრანტო კონკურსით დაინტერესებული პირებისთვის საკონსულტაციო დრო გამოიყოფა სააგენტოს ფეისბუქის გვერდზე, პირდაპირი ჩართვის მეშვეობით და განიხილება ყველა შესული კითხვა. ასევე, დაინტერესებულ პირებს შეეძლებათ კომუნიკაცია სააგენტოს შესაბამის სტრუქტურულ ერთეულთან ელექტრონული ფოსტის საშუალებით.

„ეს არის უნიკალური შესაძლებლობა რეგიონში მცხოვრები ახალგაზრდებისთვის, რომ თავიანთი იდეები აქციონ რეალობად. საგრანტო კონკურის მიზანიც ესაა, შეიქმნას გრძელვადიანი პლატფორმები რომლებიც ხელს შეუწყობს ახალგაზრდებში კომპეტენციების განვითარებას“ - ამბობს ნინო შეყლაშვილი.

საგრანტო კონკურსის ფარგლებში, თითოეულ რეგიონზე გათვალისწინებულია მაქსიმუმ სამი საგრანტო პროექტის დაფინანსება.

კონკურსთან დაკავშირებით, საინფორმაციო შეხვედრა ყველა რეგიონში გაიმართება.

საკონკურსო წინადადებების მიღება სააგენტოს ელექტრონულ პორტალზეა შესაძლებელი(Youthplatform.gov.ge), 24 თებერვლიდან 31 მარტამდე.

[რობი ზარიძე, ახალციხე]