ახალციხეში მშობლიური ენის საერთაშორისო დღე აღნიშნეს

გაეროს კალენდრის მიხედვით, 21 თებერვალი მშობლიური ენის საერთაშორისო დღეა. ‘დემოკრატ მესხთა კავშირთან’ არსებულმა ახალგაზრდულმა ცენტრმა ეს დღე ქართული დამწერლობის ისტორიის გახსენებითა და ქართული ენის დაცვისა და სიწმინდის საკითხებზე დისკუსიით აღნიშნა.

ახალგაზრდებმა ღონისძიება ორგანიზაციის საკონფერენციო დარბაზში გამართეს. მათი პირველი პრეზენტაცია ქართული დამწერლობის წარმოშობას, მეორე პრეზენტაცია კი ქართული ენის სიწმინდის დაცვას ეხებოდა. მონაწილეებმა ჟურნალისტების სამეტყველო ენაზეც იმსჯელეს. მათი აზრით, რადგან მედია და ტელევიზია დიდ გავლენას ახდენს საზოგადოებაზე, ჟურნალისტებს ტექსტების მომზადებისა და მეტყველებისას განსაკუთრებული დაფიქრება მართებთ.

ახალგაზრდებმა, ქუჩის მეტყველებასა და ჟარგონულ ენაზეც იმსჯელეს.

ღონისძიების მეორე ნაწილი ახალგაზრდების ნაწილმა საკუთარ შემოქმედებას დაუთმო და თანატოლებს თავიანთი შემოქმედებიდან ამონარიდები გააცნო. წაიკითხეს ქართულ და სომხურენოვანი ლექსები.

‘დემოკრატ მესხთა კავშირის’ ახალგაზრდული ცენტრის წარმომადგენელის ნათია გელაშვილის თქმით, 'ამ ღონისძიებით მათ სურდათ ეთქვათ თავიანთი სათქმელი მშობლიურ ენასთან დაკავშირებით'.

[ნუკა სტეფნაძე, ახალციხე]