ახალციხე ქართული ენის კვირეულს შეუერთდა

ქართული ენის კვირეულის ფარგლებში საქართველოს ყველა სახელმწიფო უნივერსიტეტის ქართულ ენაში მომზადების პროგრამის (1+4– ის) სტუდენტებმა კარნახი წერეს.

სამცხე–ჯავახეთის უნივერსიტეტში კარნახისთვის დათო ტურაშვილის მოთხრობა „კურკა“ შეირჩა. კარნახი უნივერსიტეტის 45–მა სტუდენტმა დაწერა. ნაწერებს ქართული ენის მომზადების პროგრამის პედაგოგები გაასწორებენ.

„ყურადღება მიექცევა მორფოლოგიურ და ორთოგრაფიულ შეცდომებს, გამოტოვებულ ფრაზებსა და სიტყვებს, პუნქტუაციას ნაკლები მნიშვნელობა ექნება“, – ამბობს სამცხე–ჯავახეთის სახელმწიფო უნივერსიტეტის პედაგოგი ნათელა მელიქიძე.

იმ ნაწერებს, რომლებშიც ათზე ნაკლები შეცდომა იქნება, სამცხე–ჯავახეთის უნივერსიტეტიდან თბილისში, სპეციალურ კომისიას გადაუგზავნიან. კომისია 10 საუკეთესოს გამოავლენს. მათი დაჯილდოვების ცერემონია კი 16 აპრილს საქართველოს პარლამენტის ეროვნული ბიბლიოთეკის საგამოფენო დარბაზში გაიმართება.

პროექტის, „მე მიყვარს ქართული – ჩემი სახელმწიფო ენა“, იდეა პროფესორ მარიამ მანჯგალაძეს ეკუთვნის. მასში მონაწილეობას სამცხე–ჯავახეთის სახელმწიფო უნივერსიტეტთან ერთად იღებენ: თსუ, ილიაუნი, თბილისის სახელმწიფო სამედიცინო, საქართველოს ტექნიკური, ქუთაისის, ბათუმის, სოხუმის და თელავის უნივერსიტეტები, ასევე, საქართველოს შინაგან საქმეთა სამინისტროს აკადემია.

ღონისძიება ხორციელდება „თსუ ახალგაზრდული ცენტრის“ მიერ, „გაეროს ასოციაციის“ პროექტ PITA-ს ფარგლებში, USAID-ის ფინანსური მხარდაჭერით;



[მარიამ ბარძიმაძე, ახალციხე]