ახალციხის ცენტრალურ ნაწილს დილიდან ინტერნეტი არ მიეწოდება

ქალაქის ცენტრალურ ნაწილში, ფოსტის მიმდებარე ტერიტორიაზე 70 მეტრის სიგრძეზე ტელეფონის სადენია დაზიანებული, რის გამოც ძველი ბაზრის მიმდებარე ტერიტორიაზე მცხოვრებ სილქნეტის აბონენტებს დილიდან ინტერნეტი არ მიეწოდება.

მათ შორის, დილიდან ინტერნეტის მოწოდება შეწყვეტილი აქვს „სამხრეთის კარიბჭესაც“.

ამ ეტაპზე აღდგენითი სამუშაოები ცენტრალურ პარკთან, სასტუმრო „ლომსიას“ მიმდებარე ტერიტორიაზე მიმდინარეობს. სილქნეტში ამბობენ, რომ ინტერნეტის მიწოდება მხოლოდ გვიან საღამოს, ან ხვალ დილით მოხერხდება.

„ცენტრალური სადენია დაზიანებული და ახლა ვაკეთებთ. ბორჯომიდან ველოდებით სადენებს, რომ დაზიანებული მონაკვეთი აღვადგინოთ. ამ ეტაპზე, ძველი ბაზრის მიმდებარე ტერიტორიაზე, რამდენიმე ქუჩას არ მიეწოდება“, - ამბობს კომპანია სილქნეტის მეკაბელე-მრჩილავი კობა ჩიტაშვილი.

დაზიანებისა და შეფერხების შესახებ აბონენტები არავის გაუფრთხილებია.

[თაკო თოთაძე, ახალციხე]