GDS–ის მანქანები და შეწყვეტილი ინტერნეტი ახალციხეში

ამ დროისთვის ახალციხეში, კეცხოველის ქუჩაზე „სილქნეტის“ 11 აბონენტს ინტერნეტი არ მიეწოდება. მათთან ერთად ინტერნეტის მიწოდება გუშინ, 16 სექტემბერს,N37-ე ახალციხის საოლქო კომისიასაც შეუწყდა.

„ქალაქის ტელეფონიც რომ გათიშული იყო, მივხვდი, რომ ხაზი იყო დაზიანებული, ინტერნეტის გარეშე პარალიზებული ვართ. დღეს, „სილქნეტში“ დარეკვიდან ნახევარ საათში შეფერხება გამოასწორეს“, – ამბობს N37 ახალციხის საოლქო კომისიის თავმჯდომარე თეა გავაშელი და ამატებს, რომ ინტერნეტის გათიშვის მიზეზი არ იცის.

როგორც „სილქნეტის“ წარმომადგენელმა „სამხრეთის კარიბჭესთან“ განაცხადა, ინტერნეტის შეწყვეტის მიზეზი სადენის დაზიანებაა. სადენები კი თეატრის ტერიტორიაზე მისულმა ტელეკომპანია GDS–ის სპეციალურმა მანქანებმა დააზიანეს: „კაბელები გადაჭრეს. დიდი მანქანები შეიყვანეს. გადავეცი უკვე თბილისში საავარიოს. აქ კაბელი არ გვაქვს ახლავე რომ შევცვალოთ, დღეს შაბათია, ხვალ კვირა და ორშაბათს გამოვასწორებთ. რაც მთავარია, საოლქო კომისიაში ეს პრობლემა საჩქაროდ მოვაგვარეთ“.

ტელეკომპანია GDS–ის მანქანები მესხეთის სახელმწიფო თეატრთან გუშინ, 16 სექტემბერს მივიდნენ. აქ 19 სექტემბერს, ყოფილი პრემიერ მინისტრი ბიძინა ივანიშვილი სამცხე–ჯავახეთში მომუშავე ჟურნალისტებს ხვდება. ტელეკომპანია GDS–ზე პირდაპირი ეთერის უზრუნველსაყოფად კი ტექნიკური ჯგუფი წინასწარ ჩამოვიდა.

თუმცა, როგორც კომპანიის წარმომადგენლები აცხადებენ, მათ არაფერი დაუზიანებიათ.

„აბსოლიტურად უსაფრთხოდ შემოვედით, არაფერი დაგვიზიანებია. უსაფრთხოების ნორმები წინასწარ იყო დაცული, წინ და უკან მანქანები მოგვყვებოდა, თან გვახლდა დაცვაც. ეს მცდარი ინფორმაციაა“, – ამბობს მირზა ხვედელიძე, რომელივ დაცვის თანამშრომლად გაგვეცნო.

[თამუნა უჩიძე, ახალციხე]