ადიგენის გამგებლის ყოფილ მოადგილეს სამსახურში ვერ აღადგენენ

ადიგენის მუნიცილაპიტეტის გამგებლის ყოფილ მოადგილეს მინდია ჯელიას მიუხედავად იმისა, რომ სასამართლო მოიგო, იგივე პოზიციაზე ვეღარ აღადგენენ.

„სარჩელის სასამართლოში შეტანის შემდეგ არჩევნები ჩატარდა, რაც იმას გულისხმობს, რომ მოქმედ გამგებელს უფლებამოსილება შეუწყდა, ე.ი. უფლებამოსილება შეუწყდათ მის მოადგილეებსაც. მართალია, ადიგენში მერად მოქმედი გამგებელი აირჩიეს, მაგრამ ჯელია მოადგილედ ვეღარ დაბრუნდება“, – ამბობს ახალგაზრდა იურისტთა ასოციაციის იურისტი ქეთი ბებიაშვილი, რომელიც სააპელაციო სასამართლოში მინდია ჯელიას წარმოადგენდა.

მისი თქმით, ამის გამო მათ სააპელაციო სასამართლოში სასარჩელო მოთხოვნა დააკორექტირეს: „სამსახურში აღდგენაზე აღარ ვდაობდით და ზიანის ანაზღაურება მოვითხოვეთ. სარჩელი სასამართლომ სრულად დააკმაყოფილა“.

ადიგენის მუნიციპალიტეტის გამგეობაში ჯერ გადაწყვეტილი არ აქვთ გაასაჩივრებენ თუ არა ჯელიას საქმეს უზენაესში.

"სააპელაციო სასამართლოს გადაწყვეტილება რომ ჩაგვბარდება მერე გადავწყვეტთ", – ამბობს ადიგენის მუნიციპალიტეტის გამგეობის იურიდიული სამსახურის წარმომადგენელი მადონა გულიაშვილი.

შეგახსენებთ, რომ ადიგენის მუნიციპალიტეტის გამგებელმა მისი მოადგილე მინდია ჯელია სამსახურიდან მიმდინარე წლის 20 თებერვალს გაათავისუფლა. გამგებლის გადაწყვეტილება ჯელიამ სასამართლოში გაასაჩივრა, სადაც მისი გათავისუფლების შესახებ ბრძანების ბათილად ცნობა, სამსახურში დაბრუნება და იძულებით განაცდურის ანაზღაურება მოითხოვა. ახალციხის რაიონულმა სასამართლომ ჯელიას სარჩელი 11 მაისს სრულად დააკმაყოფილა.

[თამუნა უჩიძე, ახალციხე]