გაასაჩივრებენ თუ არა გამგებლის მოადგილის საქმეს, ადიგენის გამგეობაში არ იციან

ადიგენის მუნიციპალიტეტის გამგეობას, როგორც აქ აცხადებენ, ჯერ გამგებლის ყოფილი მოადგილის მინდია ჯელიას საქმეზე გადაწყვეტილება არ ჩაბარებია.

„ჯერ არ გვაქვს გადაწყვეტილი გავასაჩივრებთ თუ არა, ველოდებით რომ გადაწყვეტილება ჩაგვბარდეს. ვნახავთ როგორი დასაბუთება იქნება და იმის მერე ვიმსჯელებთ გვიღირს თუ არა გასაჩივრება“, – ამბობს ადიგენის მუნიციპალიტეტის გამგეობის იურისტი მადონა გულიაშვილი.

შეკითხვაზე, თავად რითი ასაბუთებდა სასამართლოში მინდია ჯელიას გათავისუფლებას, გულიაშვილმა გვიპასუხა: „კანონი აძლევს გამგებელს უფლებას რომ თანამდებობის პირები, მით უფრო მოადგილე, გაათავისუფლოს“.

ასევე შეკითხვაზე, რა იყო გათავისუფლების მიზეზი, გულიაშვილი აცხადებს, რომ ამ მიზეზებზე თავად ვერ ილაპარაკებს: „ეს ჩემი საქმე არაა. მიზეზი რომც ვიცოდე, ეს განსახილველი თემა არაა. ზოგადად, ბუნებრივია, მიზეზი ყველაფერს აქვს. მე რომ დღეს აქ ვმუშაობ და არ მათავისუფლებენ, ამასაც მიზეზი აქვს“.

შეგახსენებთ, რომ ადიგენის მუნიციპალიტეტის გამგებელმა მისი მოადგილე მინდია ჯელია სამსახურიდან მიმდინარე წლის 20 თებერვალს გაათავისუფლა. გამგებლის გადაწყვეტილება ჯელიამ სასამართლოში გაასაჩივრა, სადაც მისი გათავისუფლების შესახებ ბრძანების ბათილად ცნობა, სამსახურში დაბრუნება და იძულებით განაცდურის ანაზღაურება მოითხოვა. ახალციხის რაიონულმა სასამართლომ ჯელიას სარჩელი 11 მაისს სრულად დააკმაყოფილა.

თუ ახალციხის რაიონული სასამართლოს გადაწყვტილება ძალაში დარჩება ჯელიას მინიმუმ სამი თვის ხელფასი 4 020 ლარი ადიგენის ბიუჯეტიდან უნდა აუნაზღაურონ. გასაჩივრებისა და წაგების შემთხვევაში ფინანუსურად ადგილობრივი ბიუჯეტი კიდევ უფრო იზარალებს. რამდენი ლარის გამოყოფა მოუწევს თივთმმართველბას ის იმ თვეების რაოდენობაზეა დამოკიდებული, რა დროც სასამართლოს საქმის განსახილველად დასჭირდება.

[თამუნა უჩიძე, ადიგენი]