სამცხე–ჯავახეთში სასწავლო პროცესი კიდევ 4 სკოლაში შეჩერდა

დღეიდან, 27 იანვრიდან სასწავლო პროცესი დამატებით შეჩერდა ახალქალაქის N2 და სოფლების: მურჯახეთისა და კარწახის სკოლებში. ასევე, სწავლა შეწყდა ნინოწმინდის მუნიციპალიტეტის სოფელ ეფრემოვკაში.

ჯამში სამი დღით სწავლა შეჩერებულია სამცხე–ჯავახეთის ოთხი მუნიციპალიტეტის 39 საჯარო სკოლაში.

აქ შეგიძლიათ იხილოთ ამ სკოლების ჩამონათვალი.

შეგახსენებთ, სკოლებში სასწავლო პროცესის შეჩერების გადაწყვეტილება, საქართველოს განათლებისა და მეცნიერების სამინისტრომ დაავადებათა კონტროლის ეროვნული ცენტრიდან მიღებული რეკომენდაციების საფუძველზე, გრიპის ვირუსის გავრცელების პრევენციისთვის მიიღო. სწავლა სამი დღით იმ სკოლებში შეჩერდა, სადაც გაცდენების მაჩვენებელი 20%-ს აღემატება. გაცდენილი საათები შაბათი დღეების ხარჯზე ანაზღაურდება.

ასევე, განათლების სამინისტრო სკოლებს მოუწოდებს დაიცვან ჯანდაცვის საერთაშორისო ორგანიზაციისა და საქართველოს დაავადებათა კონტროლის ეროვნული ცენტრის რეკომენდაციები, რომელიც ძირითადად პრევენციულ ღონისძიებებს უკავშირდება. კერძოდ, სკოლაში არ დაიშვას პირი, რომელსაც დაავადების ნიშნები აქვს, გაძლიერდეს შენობის სველი წესით დამუშავება, მერხებისა და იატაკების გაწმენდა შესაბამისი ხსნარებით, განიავდეს საკლასო ოთახები ყოველ შესვენებაზე, მაქსიმალურად მოხდეს პირადი ჰიგიენის, განსაკუთრებით ხელის დაბანის რეჟიმის დაცვა და ა.შ.

სამინისტროს ინფორმაციით, რამდენად ასრულებს სკოლა რეკომენდაციებს, სამინისტრო სკოლების მონიტორინგს შემთხვევითი შერჩევის პრინციპით ახორციელებს.

[თინათინ ზაზაძე, ახალციხე]