რეგიონული განვითარების სამინისტროში 24 პროექტი გაიგზავნება

ახალციხის მუნიციპალიტეტის გამგეობას სამინისტროში წარსადგენად ყველა პროექტი მზად აქვს.

- ”24 პროექტზე მეტი გვქონდა მომზადებული, მაგრამ ის პროექტები, რომლებიც მცირე ბიუჯეტს მოითხოვდნენ, მუნიციპალიტეტი დააფინანსებს”, - ამბობს ახალციხის მუნიციპალიტეტის გამგებლის მოადგილე თამარ გოგოლაძე.

სოფელ ანდრიაწმინდის ტერიტორიული ორგანოს რწმუნებულმა ნიკოლოზ ტაბატაძემ მუნიციპალიტეტის გამგეობას სამი პროექტი წარუდგინა, თუმცა აქედან რეგიონული განვითარებისა და ინრასტრუქტურის სამინისტროს მხოლოდ ერთი გადაიგზავნება.

- ”ანდრიაწმინდის და ანდის შიდა გზების და სასმელი წყლის პროექტების დაფინანსებას ვითხოვდით, მაგრამ დაწუნებულ იქნა, რადგან ამ პროექტში მცირე თანხიანები არ იყო გათვალიწინებული. ჩემი პროექტებიდან მარტო სოფლებამდე მისასვლელი 8-კილომეტრიანი გზის პროექტი გაიგზავნება, რომლისთვისაც 40,000 ლარია საჭირო”, - ამბობს იგი.

როგორც რწმუნებულებმა განმარტეს სამინისტროში გაიგზავნება ისეთი პროექტები, რომლის ხარჯთაღრიცხვაც 15,000 ლარზე მეტს შეადგენს.

რეგიონული განვითარებისა და ინფრასტრუქტურის სამინისტროში პროექტები დღის ბოლომდე გაიგზავნება. ის, თუ რომელი მათგანი დაფინანსდება, ორი კვირაში გახდება ცნობილი.

შეგახსენებთ, რომ ახალციხის მუნიციპალიტეტის პროექტების შედგენა ტერიტორიული ორგანოს რწმუნებულებს დაევალათ. ადილობრივი ხელისუფლების წარმომადგენლებმა მიმდინარე წლის პრიორიტეტები მოსახლეობასთან კონსულტაციების შემდეგ გადაწყვიტეს.

თინათინ ზაზაძე, ახალციხე