მეუფე თეოდორე: იშხანში გაწმენდითი სამუშაოები დარღვევებით მიმდინარეობს

”თურქეთის მხარემ იშხანში გაწმენდითი სამუშაოები დაიწყო. რომელიღაც თურქულ სამშენებლო კომპანია ატარებს. ადგილზე ვიყავი ჩასული და ძალიან ცუდი მდგომარეობაა”,- გვითხრა საქართველოს კათოლიკოს-პატრიარქის ქორეპისკოპოსმა, ახალციხისა და ტაო-კლარჯეთის მიტროპოლიტმა თეოდორემ (ჭუაძე) სატელეფონო საუბარში.

მისი თქმით, ტაძრის გაწმენდით სამუშაოებს არც თურქული და არც ქართული მხრიდან არქიტექტორები და არქეოლოგები არ ესწრებიან: ”მათი ყოფნა იქ აუცილებელია. იშხნის დასავლეთის მხარე მთლიანად არის გასუფთავებული და მიწა გარეთ არის გამოტანილი. ასევე გარეთ უწესრიგოდ არის მიმოფანტული ქვები, რომლებზეც ფრესკებია გამოსახული”.

ცნობილი, რომ ქართულ მხარეს თურქეთისადმი მოთხოვნა ჰქონდა წაყენებული, რომ ქართველი არქიტექტორები და გეოლოგები სარესტავრაციო სამუშაოებს დასწრებოდნენ.

”რატომღაც ეს ვერ მოხერხდა. მე თურქეთის საელჩოს და საგარეო საქმეთა სამინისტროს წერილობით მივმართე, რათა ქართველ სპეციალისტებს დართონ ნება დაესწრონ სამუშაოებს”, - ამბობს მეუფე თეოდორე.

მისივე თქმით, ჯერჯერობით ცნობილი არ არის, რას აპირებენ მხარეები:
”ზუსტი პასუხი ჯერჯერობით არ მაქვს, თუმცა რამდენადაც ვიცი, კულტურის სამინისტროს დელეგაცია იშხანში ჩასვლას და თურქულ მხარესთან შეხვედრას აპირებს”.

მეუფე თეოდორე თურქეთიდან გუშინ საღამოს დაბრუნდა.

[ნინო ზედგნიძე, ახალციხე]