თოვლმა ჯავახეთის რამდენიმე სოფლამდე მისასვლელი გზა ჩაკეტა

სამცხე–ჯავახეთში მთელი ღამე თოვდა, უხვმა ნალექმა ნინოწმინდისა და ახალქალაქის რამდენიმე სოფელში მისასვლელი გზა ჩაკეტა. ადგილობრივ თვითმმართველობებში განმარტავენ, რომ სპეციალური ტექნიკა სოფლებში დილიდან მუშაობს.

თოვლმა ახალქალაქის მუნიციპალიტეტში დაახლოებით 10 სოფლის მისასვლელი გზა ჩაკეტა, ესენია ჩუნჩხა, პტენა, ოკამი, გოგაშენი, თოთხამი, კორხი, აფნია ქარცები და ამ სოფლების მიმართულებით სხვა დასახლებებიც.

„გუშინ გავმწმინდეთ და დღეს ისევ ჩაკეტილია, ტექნიკა მუშაობს და იწმინდება“, – განაცხადა ახალქალაქის მუნიციპალიტეტის გამგებლის მოადგილემ შალვა ბალახაძემ.

უხვმა ნალექმა პრობლემები შექმნა ნინოწმინდის მუნიციპალიტეტშიც. გამგებლის მოადგილე ალექსანდრე მიქელაძე აცხადებს, რომ ღამით მისასვლელი გზა სამი სოფლის მიმართულებით ჩაიკეტა.

„გასულია ტექნიკა და იწმინდება. ღამე ჩაკეტილი იყო გზა მაღალმთიან სოფლებში სპასოვკის და ტამბოვკის მიმართულებით“, – ამბობს ალექსანდრე მიქელაძე.

რაც შეეხება მესხეთს, როგორ ასპინძის, ადიგენის, ბორჯომის და ახალციხის მუნიციპალიტეტებში განაცხადეს, თოვლის გამო გზა არცერთ სოფელში არ ჩაკეტილა. გზა სპეციალური ტექნიკით იწმინდება და ტექნიკური მარილი იყრება.
დილიდან ცენტრალური ქუჩები თოვლისგან იწმინდება ახალციხეშიც.

[თინათინ ზაზაძე, სამცხე–ჯავახეთი]