ახალქალაქის სამ სოფელში თოვლმა გზა ჩაკეტა

ახალქალაქის მუნიციპალიტეტის გამგეობაში აცხადებენ, რომ სპეციალური ტექნიკა გზების გადასწმენდად უკვე გაგზავნილია და დღის ბოლომდე სოფლებამდე მისასვლელი გზა გათავისუფლდება.

„ჩამდურასა და მურჯახეთის მიმართულებით დაახლოებით სამი კილომეტრია გასაწმენდი, ფილიპოვკამდე კი ორი. დღეს აუცილებლად გაიწმინდება. გაწმენდითი სამუშაოები, რომ დაიწყება ადგილზე მეც გავალ“, – განაცხადა ახალქალაქის მუნიციპალიტეტის გამგებლის მოადგილემ შალვა ბალახაძემ.

მისივე თქმით, თოვლის გამო გზა ჩაკეტილია სოფელ ხორენიის მიმართულებით, მაგრამ მოსახლეობა ალტერნატიული გზით სარგებლობს.
„ხორენიას ორი მისასვლელი გზა აქვს, ერთი თავისუფალია, მეორე მხრიდან მისასვლელის გასაწმენდად კი დიდი ტექნიკაა საჭირო, ვცდილობთ, რომ ეს საკითხიც მოვაგვაროთ“, – განმარტავს შალვა ბალახაძე.

შეგახსენებთ, რომ სამცხე–ჯავახეთში უხვი ნალექი 29 იანვარს მოვიდა, რის გამოც ჯავახეთის მაღალმთიან სოფლებამდე მისასვლელი გზები ჩაკეტა.

გუშინ გარესამყაროს ახალქალაქსა და ნინოწმინდაში დაახლოებით 15 სოფელი იყო მოწყვეტილი. გაწმენდითი სამუშაოები ამ ეტაპზე ახალქალაქის სამ სოფელში მიმდინარეობს.

[თინათინ ზაზაძე, ახალქალაქი]