ადგილობრივები: თოვლის გამო ადიგენის სოფლებში გადაადგილება შეუძლებელია

ერთი კვირაა სამცხე–ჯავახეთში თითქმის ყოველდღე თოვს, რაც ავტომობილების გადაადგილებას აფერხებს. განსაკუთრებით მაღალი თოვლის საფარი მაღალმთიან ზონაშია.

ადიგენის მაღალმთიან სოფლებში ამბობენ, რომ ბოლო რამდენიმე დღეა სოფელში აღარც საზოგადოებრივი ტრანსპორტი მიდის და ადგილობრივები სოფლიდან გამოსვლასაც ვერ ახერხებენ, თუ სპეციალურად მაღალი გამავლობის მქონე მანქანა არ მოძებნეს.

„სამხრეთის კარიბჭეს“ ამ პრობლემების შესახებ, სოციალურ ქსელში რამდენიმე მოქალაქემ გამოუგზავნა შეტყობინება. გზის პრობლემების შესახებ, ასვე სოციალურ ქსელში დღეს ჭელის მეჩეთის წინამძღვარი ჯამბულ აბულაძეც წერდა.

მისი განცხადებით, ორი დღეა ადიგენი–მოხეს დამაკავშირებელი გზა არ გაწმენდილა თოვლის საფარისაგან. მხოლოდ მაღალი გამავლობის ავტომობილითაა შესაძლებელი გადაადგილება. სოფელში ვერც სამარშრუტო ავტობუსები მოძრაობს და მხოლოდ ფეხის ბილიკითაა მისვლა შესაძლებელი.



მიუხედავად ამ ვითარებისა, ადგილობრივ თვითმმართველობაში აცხადებენ, რომ მუნიციპალიტეტის სოფლებში შიდა გზების გაწმენდითი სამუშაოები აქტიურად მიმდინარეობს.

ადიგენის გამგეობის საზოგადოებასთან ურთიერთობის სამსახურში განმარტავენ, რომ მძიმე ტექნიკამ მუშაობა სოფლებში მას შემდეგ დაიყო, რაც მუნიციპალიტეტში ჭარბი ნალექი დაფიქსირდსა. დუკვე გუშინ, 8 დეკემბერს კი ყველა სოფლამდე მისასვლელი გზა ბოლომდე გაიწმინდა და გადაადგილების პრობლემა არსად არაა.

„რამოდენიმე ერთეული ტექნიკა მუშაობდა დილიდან, თუ საჭიროება იქნება, კიდევ იმუშავებენ მთელი ღამე. ცენტრალური გზები ისეც გაწმენდილი იყო. ფხეროს, კახარეთის, ხარჯამის მიმართულებით გაწმენდილია“, –განუცხადა გუშინ, 8 დეკემბერს, „სამხრეთის კარიბჭეს“ ადიგენის გამგეობის საზოგადოებასთან ურთიერთობის სამსახურის სპეციალისტმა მამუკა კალანდაძემ.







[თაკო ფეიქრიშვილი, ადიგენი]