TV ‘იბერიას’ ჟურნალისტის ცემის საქმეში ბრალდებულებს აღკვეთის ღონისძიებად პატიმრობა შეეფარდათ

ტელეკომპანია „იბერიას“ ჟურნალისტის გიორგი გასვიანის ცემის ფაქტზე დაკავებული ბრალდებულების აღკვეთის ღონისძიებაზე სასამართლოპროცესი დღეს, 27 იანვარს, რამდენიმე საათის განმავლობაში მიმდინარეობდა. პროცესს გიორგი გასვიანიი და მისი ადვოკატი არ დასწრებიან.

პროკურატურამ სამივე ბრალდებულის – მიხეილ ხუციშვილის, პაატა კვინიკაძისა და ბორის გოგიჩაიშვილისთვის, აღკვეთის ღონისძიებად პატიმრობის შეფარდება ითხოვა. პროკურატურის განცხადებით, არსებობს დასაბუთებული ვარაუდი რომ თავისუფლებაში მყოფი ბრალდებულები ზემოქმედებას მოახდენენ მოწმეებზე.

პროკურატურამ ყურადღება იმ გარემოებაზეც გაამახვილა, რომ ბრალდებულები არ აღიარებენ დანაშაულს არ თანამშრომლობენ გამოძიებასთან, ამასთან მათ დანაშაულის ჩადენისთანავე სცადეს მისი დაფარვა: „კერძოდ მას შემდეგ, რაც მათთვის ცნობილი გახდა, რომ დაზარალებული გიორგი გასვიანი იყო ჟურნალისტი, დაიწყეს მისი დაყოლიება, რომ არ გაემჟღავნებინა მომხდარი და არ მიემართა სამართალდამცავი ორგანოებისთვის. დაზარალებული სასტუმროში დატოვეს მას შემდეგ, რაც მიიღეს პირობა, რომ მომხდარის შესახებ გიორგი გასვიანი არსად განაცხადებდა“.

დაკავებულების ადვოკატები პროკურატურის შუამდგომლობას არ დაეთანხმნენ. მეტიც, მათ განაცხადეს, რომ არცერთი ბრალდებული დანაშაულს არ აღიარებს და სისხლისსამართლებრივი დევნის შეწყვეტა ითხოვეს.

ახალციხის რაიონული სასამართლოს მოსამართლე გოჩა ჯეირანაშვილმა, პროკურატურის შუამდგომლობა გაითვალისწინა და დაკავებულებს აღკვეთის ღონისძიებად პატიმრობა შეუფარდა.

მოსამართლის გადაწყვეტილების გასაჩივრებას, მხოლოდ ერთი დაკავებულის, მიხეილ ხუციშვილის ადვოკატი პაატა გოგალაძე აპირებს. იგი ამბობს, რომ მოსამართლის გადაწყვეტილება დასაბუთებული არ იყო, ამიტომ, ზემდგომ ინსტანციას მიმართავს.

მოსამართლის გადაწყვეტილებას არ ეთანხმება, თუმცა, არც მის გასაჩივრებას აპირებს, მეორე ბრალდებულის, პაატა კვინიკაძის ადვოკატი ირაკლი ბარძიმაძე: "პიარკამპანია იყო, მეტი არაფერი, იგი საერთოდ არ იყო დასაბუთებელი. თქვენ, ჟურნალისტებმა შეძელით ზეგავლენა მოგეხდინათ სახელმწიფოს მაღალჩინოსნებზე. იმიტომ რომ თქვენ დამშვიდდეთ და დაწყნარდეთ, უდანაშაულო ხალხი უნდა წავიდნენ პატიმრობაში. რა აზრი აქვს, მითხარით, ამ გადაწყვეტილების გასჩივრებას?1“

შეგახსენებთ, სამცხე-ჯავახეთის საოლქო პროკურატურამ გიორგი გასვიანის ცემის ფაქტზე ბორჯომში სამი პირი გუშინ დააკავა; საქართველოს პროკურატურის ცნობით, ერთ-ერთი დაკავებული ყოფილი უფროსი ინსპექტორ - გამომძიებელია, ხოლო მეორე - დაცვის პოლიციის ყოფილი ინსპექტორი. პროკურატურამ ბრალდებულები სასამართლოს განჩინების საფუძველზე დააკავა. აქვე შეგახსენებთ, რომ ტელეკომპანია „იბერიას“ ჟურნალისტი გიორგი გასვიანი ბორჯომელ პოლიციელს ცემაში ადანაშაულებს. ინციდენტი 18 დეკემბერს მოხდა. მაშინ, როდესაც ჟურნალისტი, ბორჯომში, სასტუმრო ‘ქრაუნ პლაზაში’ სემინარზე მიდიოდა.

[ნინო ნარიმანიშვილი, ლუბა გიორგაძე, ახალციხე]