დამწვარი სამი ძროხა, ოთხი ხბო და ღორები – ხანძარი ვალეში [Photo]

შემთხვევა დღეს, 27 იანვარს, გამთენიას მოხდა. ცეცხლი კრმაჯიანების საქონლის სადგომს გაუჩნდა. ხანძარმა სამი მეწველი ძროხა, ოთხზე მეტი ხბო და ღორები იმსხვერპლა, – მათი ნაწილი ცეცხლში ჩაიწვა, ნაწილი კი კვამლისგან გაიგუდა.

ხანძრის გამომწვევ მიზეზები ამ დროისათვის უცნობია. გამგებლის წარმომადგენელი ვალის ტერიტორიულ ორგანოში, ელიოზ ბარბლიშვილი „სამხრეთის კარიბჭესთან“ აცხადებს, რომ ადგილზე იმყოფებოდნენ „ენერგო-პრო-ჯორჯიას“ ახალციხის სერვის– ცენტრის წარმომადგენლები, რომლებმაც ხანძრის გამომწვევ მიზეზად ელექტროგაყვანილებები ს გაუმართაობა გამორიცხეს.

„რას შეეძლო გაეჩინა ხანძარი,ოჯახის წევრებმაც არ იციან, სახლში იყვნენ და ეძინათ“, - ამბობს ელიოზ ბარბლიშვილი.

მისივე თქმით, საქონლის სადგომი დასახლებისგან შორს იყო და ხანძრის გავრცელების საშიშროება არ ყოფილა. მეხანძრეებმა ცეცხლის ჩაქრობა მალევე მოასწრეს.

ელიოზ ბარბლიშვილის თქმით, ხანძრის შესახებ მუნიციპალიტეტის გამგეობას უკვე ეცნობა. ზარალს აღწერენ და რეაგირებას მოახდენენ: „დილითვე ვიყავი, ფოტოები გადავიღე და გამგეობას გადავუგზავნე. ზარალს აღწერენ და იმის მიხედვით გაირკვევა, თუ რა დახმარება შეიძლება გაეწიოს კრმაჯიანების ოჯახს“.

კრმაჯიანების საქონლის სადგომში გაჩენილი ხანძრის მიზეზებზე გამოძიება, შსს-მ სისხლის სამართლის კოდექსის 188-ე მუხლით დაიწყო, რაც გაუფრთხილებლობით ნივთის დაზიანებას ან განადგურებას გულისხმობს.











[ლუბა გიორგაძე, ახალციხე]