ჟენია მერაბიშვილის მიერ მოსწავლეების ცემას მანდატურის სამსახური ადასტურებს

ცენტრალური ტელეკომპანია მე-9 არხის ჟურნალისტთან საუბარში სკოლის დირექტორმა ჟენია მერაბიშვილმა მოსწავლეების ცემის ფაქტი უარყო და განაცხადა, რომ მხოლოდ გაფრთხილებით შემოიფარგლა. ერთ-ერთი მოსწავლის მშობელმა მომხდარი არ უარყო, თუმცა განაცხადა, რომ მისი შვილი იმდენად შეურაცხყოფილი არ იყო, რამდენადაც სხვისი შვილი. ”და, თუ რამის გამოკვლევას აპირებთ, სკოლის წინაშე, რომ მოხდა ეგ ფაქტი, აი ის გამოიძიეთ ჯერ და მერე დამიკავშირდით მე”, - განუცხადა მან მე-9 არხს სატელეფონო საუბარში.

ცენტრალურ ტელეკომპანიასთან მომხდარი დაადასტურა მანდატურის სამსახურმა.

- ’ვადასტურებ, აღნიშნული ფაქტი დააფიქსირა მანდატურმა, ბავშვის ცემის ფაქტი. ფაქტი დადასტურებულია კამერითაც. ჩვენ ახალი კანონმდებლობით არ გვაქვს ბავშვისა და მასწავლებლის და ასევე დირექტორის საქმიანობაში ჩარევის უფლება, უბრალოდ, აღნიშნული ფაქტი დავაფიქსირეთ და გადავეცით განათლების სამინისტროს”, - ამბობს მე-9 არხთან საუბარში ახალციხის მანდატურის სამსახურის უფროსი თამაზ ფაილოძე.



მეხუთე სკოლაში მომხდარს ამავე სახელწოდების ადგილობრივი ტელევიზია, ადგილობრივი მე-9 არხიც იკვლევდა.

- ’ჟურნალისტი პირდაპირ ჩემი სახელით მოვიდა, მე არც არსად გამიხმაურებია, არც მიჩივლია. შეიძლება კიდეც ეცემა, მაგრამ, შეიძლება მე არ ვუჩივი იმ ქალს, ვერ გავიგე”, - აცხადებს დამლაგებელი მე-9 არხის ჟურნალისტთან საუბარში.

ჟენია მერაბიშვილმა ჟურნალისტთან საუბარში განაცხადა, რომ მოსწავლეები არ უცემია, უბრალოდ დაგვიანების გამო გალანძღა. რაც შეეხება დამლაგებელს, ’როგორ შემეძლო მისი ცემა, როცა ჯერ ნათესავია და მეორეც, ლუკმა-პურს აქედან ჭამს. და პირიქით, რომ ჩამოსულა, ტირილი დაუწყია, როგორ ვაწყენინე ჟენია მასწავლებელსო, ეტყობა სათვალთვალო თვალმა დააფიქსირა მისი ტირილი და ეტყობა ვიღაცას ეს დასჭირდა’, - განაცხადა სკოლის დირექტორმა.



[ნინო ნარიმანიშვილი, ახალციხე]