რატომ ხევენ მინაძეში წყლის ქვითრებს

მინაძე ასპინძის მიმართულებით, ორფოლოს პოლიგონისკენ მიმავალ ტრასასთან მდებარეობს. ადგილობრივები სოფელს პირობითად ორ ნაწილად, გაღმა და გამოღმა მინაძედ ყოფენ. სასმელი წყლის პრობლემა სოფლის ნაწილს აქვს, მათ, ვინც ორფოლოს გზის მხარეს ცხოვრობს. ყურადღების მიპყრობას ისინი სამი წელია უშედეგოდ ცდილობენ.

12-წევრიანი გვირჯიშვილების ოჯახი წყალს საუბნო წყაროდან ეზიდება.

- ‘დავიღალეთ! ისე გააკეთონ, რომ მთელ სოფელს ჰქონდეს წყალი და არა ნახევარს’, - გვეუბნება გულო გვირჯიშვილი.

მიუხედავად იმისა, რომ სოფლის ამ ნაწილს წყალი არ აქვს, გადასახდის გადახდას მათ მაინც სთხოვენ.

- ‘ქვითრები მოიტანეს და მათ თვალწინ დავხიე. მომიყვანონ წყალი და გადავიხდი. ოთხი თვის დავალიანება 70 ლარი იყო, მაგრამ ერთ თეთრსაც არ გადავიხდი’, - გვეუბნება სულიკო ანტონიანი.

მინაძის პრობლემაზე „სამხრეთის კარიბჭე“ 2012 წლის დეკემბერშიც წერდა. მაშინ უწყლობის გამო სოფლის მცხოვრებლები ერთმანეთს დაუპირისპირდნენ. მინაძელების მოთხოვნა უცვლელია. ისინი ითხოვენ წყალს ყველა ოჯახში და გამრიცხველიანებას და აცხადებენ, რომ ამ შემთხვევაში უპრობლემოდ გადაიხდიან სასმელი წყლის გადასახადსაც.

‘საქართველოს გაერთიანებული წყალმომარაგების კომპანიის’ სამცხე-ჯავახეთის ფილიალის მენეჯერი გიორგი ბაგინაშვილი ამბობს, რომ გამრიცხველიანება დიდ თანხებთანაა დაკავშირებული და ეს მის სამსახურს არ ეხება.

-‘ჩვენ მარტო სარემონტო სამუშაოებისთვის გვაქვს თანხები გამოყოფილი. მინაძეს პროექტი სჭირდება, ამაში ადგილობრივი ხელისუფლებაც უნდა ჩაერთოს“, - ამბობს ბაგინაშვილი.

იმისათვის, რომ პრობლემის მოგარებაში ადგილობრივი ხელისუფლება ჩაერთოს, მოსახლეობამ მას წერილობით, განცხადებით უნდა მიმართოს. ადგილობრივებს კი ჯერ გამგეობაში განცხადება არ შეუტანიათ.



[ნუკა სტეფნაძე, ახალციხე]