მეხუთე სკოლის მასწავლებელს, რომელსაც მოსწავლეების ცემაში ადანაშაულებენ, სკოლაში დაბრუნება სთხოვეს

სადამრიგებლო კლასის მოსწავლეებმა მასწავლებელს სახლთან დღეს, 20 ოქტომბერს, საღამოს მიაკითხეს. მოსწავლეებმა ეზოში ნახერხით გულის ფორმის ცეცხლი დაუნთეს და შეძახილებით: „ეთერი მას, გვიყვარხარ“, შეეცადნენ მასწავლებლისთვის სკოლის დატოვების გადაწყვეტილება შეეცვლევინებინათ. (ეს ის კლასი არ არის, რომლის მოსწავლეებიც ცემაში ადანაშუალებენ. ს.კ.)

„ჩვენი სითბო ამით გამოვხატეთ, არ გვინდა, რომ ეთერი მასწავლებელი ჩვენი სკოლიდან წავიდეს“, – გვითხრეს ეთერი გვირჯიშვილის სადამრიგებლო კლასის მოსწავლეებმა.

მოსწავლეების თქმით, გულის დანთების შემდეგ, ეთერ გვირჯიშვილი ეზოში ჩავიდა: „ჩამოვიდა, მოგვეფერა, ყველა ჩაგვკოცნა, ცრემლები მოსდიოდა. სკოლაში დაბრუნების შესახებ არაფერი უთქვამს“.

შეგახსენებთ, დღეს, 20 ოქტომბერს, ახალციხის მეხუთე საჯარო სკოლის მათემატიკის მასწავლებელმა, ეთერ გვირჯიშვილმა, რომელსაც მოსწავლეები ცემაში ადანაშაულებენ, სკოლიდან წასვლის შესახებ დაწერა განცხადება.

მეხუთე სკოლის დირექტორის, ინგა ვარდიძის თქმით, რომელსაც ჯერ განცხადებაზე რეზოლუცია არ დაუდია, განცხადების თანახმად, გვირჯიშვილი სკოლას ჯანმრთელობის მდგომარეობის გამო ტოვებს.

„სამხრეთის კარიბჭემ“ გადაწყვეტილების მოტივის გარკვევა ეთერ გვირჯიშვილთან სცადა. გვირჯიშვილმა მომხდარში რედაქცია დაადანაშაულა.

„თქვენი წყალობით დავტოვე სკოლა, თქვენმა სტატიამ ისე ცუდად გამხადა, ლამის გარდავიცვალე. ღირს კი ამის შემდეგ სკოლაში მუშაობა?! მეორედ აღარ დამიკავშირდეთ, დამამშვიდებლებს ვსვამ და ნუ მაწუხებთ“, – გვითხრა ეთერ გვირჯიშვილმა.

შეგახსენებთ, რომ მას შემდეგ, რაც „სამხრეთის კარიბჭემ“ შესაძლო ძალადობის ფაქტზე მასალა გამოაქვეყნა, მომხდარით სამართალდამცავი უწყებები დაინტერესდნენ. ახალციხის რაიონულმა სამმართველომ ცემის შესაძლო ფაქტზე, სსკ–ის 125–ე მუხლით ძიება დაიწყო. განათლების სამინისტროში კი აცხადებენ, რომ მომხდარი ჯერ სკოლის დისციპლინურმა საბჭომ უნდა შეისწავლოს და თავად ამის შემდეგ ჩაერთვებიან.

[ვარლამ წიკლაური, ახალციხე]