ლეიკემიით დაავადებული ახალგაზრდის ოჯახი დახმარებას ითხოვს

ახალციხის მუნიციპალიტეტის სოფელ წყორძაში მცხოვრებ მარინა გიორგაძეს ექიმებმა ლეიკემიის დიაგნოზი ერთი თვის წინ დაუსვეს. მარინა სამედიცინო ცენტრში 2 აგვისტოს დააწვინეს და მას შემდეგ მკურნალობს. მიუხედავად იმისა, რომ საყოველთაო დაზღვევა მკურნალობის ხარჯების 80 პროცენტს ანაზღაურებს, უკიდურესად გაჭირვებულ ოჯახს დარჩენილი 20 პროცენტის გადახდის საშუალება არ აქვს.

„ერთი წამალი 1200 ლარი ღირს, მართალია 20 პროცენტს ვიხდით, მაგრამ ამის საშუალებაც არ გვაქვს. ყოველდღიურად უამრავი წამლის ყიდვა გვჭირდება. შვიდსულიან ოჯახში მარტო მე ვმუშაობ, სანამ საყოველთაო დაზღვევის ფურცელი მოგვივიდა, 4000 ლარი მანამდე დავხარჯეთ“,-ამბობს მარინას ძმა მამუკა გიორგაძე.

ოჯახს შვილის ავადმყოფობის გამო თბილისში ბინის დაქირავებაც მოუხდა.

„250 ლარს ვიხდით ბინაში. პლუს ასეთი მძიმე დაავადება აქვს და კარგი კვება უნდა. ძალიან გვიჭირს, მევალეები ყოველდღიურად გვაკითხავენ ოჯახში. მარინას ავადმყოფობის გამო ჩემმა მეორე შვილმა ახალციხეში სამსახური მიატოვა და ოჯახს უვლის. ორი ძროხა მყავს, ისიც რომ გავყიდო, რაღა ვაჭამო შვილებს? თბილისში ქირით ცხოვრება და ასეთი ავადმყოფის მკურნალობა ადვილი არ არის“,-ამბობს მარინას დედა ციალა გიორგაძე.

ოჯახმა დასახმარებლად ახალციხის მუნიციპალიტეტის ხელმძღვანელობას განცხადებით მიმართა, თუმცა დახმარებაზე უარი მიიღო.

“საკრებულოს თავმჯდომარის მოადგილემ მალხაზ ასპანიძემ გვითხრა, რომ ასეთ მკურნალობას ჩვენ ვერ ვაფინანსებთ, გარდა გადაუდებელი ოპერაციებისო და განცხადებაც არ დაიტოვა. სისხლის კიბო აქვს ჩემს შვილს, სამი წელი სჭირდება მკურნალობა და შეიძლება ძვლის ტვინის გადანერგვა დასჭირდეს. გამგეობას ნუთუ არ აქვს იმის საშუალება, სულ ცოტა თანხით დაგვეხმაროს, რომ ავადმყოფ შვილს საჭმელი ვაჭამო და ბინის ქირა გადავიხადო?“ - კითხულობს ციალა გიორგაძე.

ახალციხის მუნიციპალიტეტის გამგეობაში განმარტავენ, რომ ადგილობრივი თვითმმართველობა მხოლოდ ქირურგიულ ოპერაციებს აფინანსებს და ისიც იმ შემთხვევაში, თუ ხარჯებს საყოველთაო დაზღვევა არ ფარავს.

„განცხადების დატოვებას აზრი არ ჰქონდა. მიმართულება მივეცი, რომ საყოველთაო დაზღვევა გამოეყენებინათ, რათა ოჯახს უფრო მეტი დახმარება მიეღო. შემდეგ დამირეკეს და მითხრეს, რომ დაზღვევა 80 პროცენტს აფინანსებდა. ჩვენ ლეიკემიით დაავადებულების მკურნალობას ვერ ვაფინანსებთ, ამისთვის ბიუჯეტში გათვალისწინებული თანხა არ გვაქვს. ჩვენ გვაქვს საოპერაციო ხარჯი და თუ ოპერაცია დასჭირდებოდა, 50 პროცენტით დავუფინანსებდით“,- ამბობს ახალციხის მუნიციპალიტეტის საკრებულოს თავმჯდომარის მოადგილე მალხაზ ასპანიძე.

მისივე განმარტებით, იმ ოპერაციებს, რომელსაც საყოველთაო დაზღვევა ანაზღაურებს, ადგილობრივი თვითმმართველობა აღარ აფინანსებს: “საყოველთაო დაზღვევის შემდეგ შეიცალა დაფინანსების პრინციპი, ვინაიდან სახელმწიფო აფინანსებს, ჩვენ იგივე ოპერაციებს აღარ ვაფინანსებთ. რადგან ჩვენ ოპერაციის თანხის 50 პროცენტს ვუნაზღაურებთ, სახელმწიფო კი 80 პროცენტს, ოჯახს შეღავათი სახელმწიფო დაზღვევისგან უფრო მეტი აქვს, ვიდრე ჩვენგან".

თანხა, რომლითაც ახალციხის მუნიციპალიტეტის გამგეობა ადგილობრივ მოსახლოებას ქირურგიული ჩარევის დროს ეხმარება, ჯამში 200,000 ლარს შედაგენს. ამ დრომდე მუნიციპალიტეტის მასშტაბით 151 ადამიანს გაუწიეს დახმარება, რაც ჯამში 99,515 ლარია.

[თინათინ ზაზაძე, ახალციხე]