არათანაბარი დანამატი პედაგოგების ხელფასზე

მთავრობის გადაწყვეტილებით, ერთ ხელფასზე დანამატმა 70 ლარი შეადგინა. ზოგ პედაგოგს, სტაჟისა და პროფესიული უნარების გათვალისწინებით, ხელფასი მეტად მოემატა. მაგისტრის ხარისხის მქონე მასწავლებლებისთვის ხელფასზე დანამატი 80-90 ლარი იყო. მასწავლებლების ხელფასები ბოლოს დაახლოებით 3 წლის წინ გაიზარდა.

თუ აქამდე მაგისტრის ხარისხის მქონე მასწავლებლის ხელფასი 326 ლარი იყო, ახლა ეს თანხა 413 ლარამდე გაიზარდა.

- „მნიშვნელოვანია ნებისმიერი ნაბიჯი, რომელიც განათლების დონის ამაღლებისკენ იქნება გადადგმული. ჩემი ხელფასი, ჯერჯერობით ზუსტად არ ვიცი, მაგრამ დაახლოებით 50 ლარით გაიზარდა“, – გვითხრა ერთ-ერთმა მათემატიკის მასწავლებელმა.

ხელფასის მომატებისთვის საჭიროა მასწავლებელმა დირექციას ქართულ ენაზე თარგმანილი და დამოწმებული დიპლომის ასლი მიაწოდოს. ეს საჭიროა მონაცემების შესაკრებად, რათა სისტემის გადაწყვეტილების თანახმად ხელფასები გაიზარდოს.

სხვადასხვა საგნების მასწავლებლები ჩივიან, რომ ხელფასები არათანაბრად ისაზღვრება და ზოგიერთი საგნის მასწავლებელი, საათების იგივე რაოდენობაზე და იგივე კვალიფიკაციით, მეტს იღებს, ვიდრე სხვები. მიუხედავად იმისა, რომ ეს სიახლე არ არის, მასწავლებლების მხრიდან ამ ფაქტის აღნიშვნა მუდმივად ხდება. მაგალითად, საქართველოს ისტორიისა და საქართველოს გეოგრაფიის მასწავლებლები მეტ ხელფასს იღებენ.
ახალქალაქის საგანმანათლებლო რესურსცენტრში ეს ფაქტი შემდეგნაირად განგვიმარტეს.

„დღეს მეტი ყურადღება ექცევა საგნებს, რომლებიც მრავალი წლის განმავლობაში, ასე რომ ვთქვათ, ჩრდილში იყო მოქცეული. ეს მიმართულია განათლების ხარისხის ამაღლებისკენ“, – გვითხრა რესურსცენტრის დირექტორმა ნარცის კარაპეტიანმა.

სასწავლო წლის დასაწყისში სომხურენოვან სკოლებში 1–დან მე–6 კლასებამდე სწავლების ორენოვანი სისტემა დაინერგა. მასწავლებლებს, ვინც ამ სისტემით ასწავლის, ხელფასის მომატებას დაპირდნენ, მაგრამ ასე არ მოხდა. და ახლაც ბილინგვურ სწავლებაში ჩართულ პედაგოგებს ისევე მოუმატეს ხელფასები, როგორც სხვებს. მასწავლებლები, რომლებიც ორენოვანი სისტემით ასწავლიან, იმდენ ქართულს არ ფლობენ, რომ ბავშვებს ორენოვანი სისტემით გათვალისწინებული მასალა სრულყოფილად ასწავლონ. ნარცის კარაპეტიანის თქმით, ჩვენს რაიონში არ არიან მასწავლებლები, რომლებიც ორენოვანი სისტემით სწავლებას შეძლებდნენ, ამიტომაც მათ ხელფასები არ მოემატათ.

ნარცის კარაპეტიანმა ასევე განაცხადა, რომ კადრების უკმარისობა არის არა მხოლოდ ორენოვანი სისტემის მასწავლებლებს, არამედ ბევრი სხვა საგნის პედაგოგებს შორისაც. ასეთი საგნებია, მაგალითად, მათემატიკა, ქართული ენა, გეოგრაფია, ისტორია, ქიმია, ბიოლოგია და სხვა.

[აღუნიკ აივაზიანი, ახაქალაქი]