ქართული ენის კურსებმა პედაგოგები შეაშინა

პედაგოგებისათვის ქართული ენის შესასწავლად ახალი პროგრამა იწყება. ბევრ სკოლას ეს ინფორმაცია ულტიმატუმის სახით მიეწოდა

ქართული ენის შესწავლა პირველი-მეექვსე კლასის პედაგოგებს ჟვანიას სკოლის პროგრამით ჩაუტარდებათ. ახალქალაქში ტრენინგები ენის სახლში ჩატარდება. კურსის ხანგრძლივობა 90 საათია.

ახალი სასწავლო კურსები შექმნილია იმ პედაგოგების მომზადების მიზნით, რომლებიც სწავლებას ბილინგური სისტემით ჩაატარებენ. პედაგოგებმა საგანი ორ ენაზე ქართულად და სომხურად უნდა ასწავლონ (ან რუსულად, რუსულ სკოლაში). პედაგოგებისა და მშობლების უმრავლესობას მიაჩნია, რომ განათლების ახალი სისტემა ეფექტური ვერ იქნება, რადგან პედაგოგები ქართულ ენას ვერ ფლობენ. ამასათნ, ყველა სახის კურსები და სასწავლო პროგრამები არ იძლევა საკმარის ცოდნას იმისათვის, რომ პედაგოგებმა შეძლონ საგნის მომზადება ქართულ ენაზე.

ახლახანს, ყველა სკოლაში ჩატარდა კრება, სადაც მასაწავლებლებს მიაწოდეს ინფორმაცია ქართული ენის ახალი კურსების შესახებ. არნიშნული კურების დამთავრების შემდეგ პედაგოგებმა გამოცდა უნდა ჩააბარონ. დირექტორებმა განაცხადეს, რომ კურსებზე დასწრება სავალდებულოა. ზოგმა პედაგოგებს ულტიმატუმიც წაუყენა: იმ შემთხვევაში, თუ გამოცდებს ვერ ჩააბარებენ, სამსახურიდან განთავისუფლდებიან. ასეთმა მიდგომამ პედაგოგებში არც თუ უსაფუძვლო შიში გამოიწვია.


პედაგოგების დამოკიდებულების გასარკვევად, ’’სამხრეთის კარიბჭე’’ ახალქალაქის ორ სომხურ სკოლას ესტუმრა. მასწავლებლები ამბობენ, რომ ქართული ენის შესწავლა უნდათ, თუმცა, აშინებთ მუქარა სამსახურიდან განთავისუფლების შესახებ.

- ”ეს სამართალია?! დირექტორმა განაცხადა, რომ ვალდებული ვართ დავესწროთ ქართული ენის კურსებს ენის სახლში, რომ სექტემბერში საათების განაწილებისას პრობლემები არ გვქონდეს”, - გვითხრა დაწყებითი კლასების მასწავლებელმა იმ პირობით, რომ მის ვინაობას არ გავამხელდით.

იგივე განწყობაა კიდევ ერთ სომხურ სკოლაშიც. პედაგოგები მოსაზრებებს იმ პირობით გვიზიარებენ, რომ მათ ვინაობას ანონიმურად დავტოვებთ.

- ”მკაცრად მოგვთხოვეს, მაგრამ რამდენად შესაძლებელია ჩვენს ასაკში სამი თვის განმავლობაში ენის შესწავლა, არ ვიცი”, - ამბობს ახალქალაქის საჯარო სკოლის მასწავლებელი.

- ”დირექტორმა განაცხადა, რომ თუ არ გავივლით ქართული ენის კურსებს და არ ჩავაბარებთ გამოცდას, სამსახურს დავტოვებთ. მაგრამ ხომ შეიძლება აღმოჩნდეს, რომ ეს დრო საკმარისი არ არის ენის შესასწავლად”, - ამბობს ერთ-ერთი პედაგოგი.

ახალქალაქის საგანმანათლებლო რესურსცენტრის დირექტორი ნარცის კარაპეტიანი ამბობს, რომ სახელმწიფო ენის უცოდინარობის გამო მასწავლებლებს არავინ გაათავისუფლებს: ”აქ არაფერია იძულებითი. გონივრულია, გაათავისუფლო ადამიანი ქართული ენის არცოდნისათვის?! ეს შეუძლებელია! მაშინ 90 პროცენტი უნდა დავითხოვოთ”.

პირველი საჯარო სკოლის დირექტორი რუზანა ტეპოიანი აცხადებს, რომ ეს ულტიმატუმი არ არის: ’’ჯერჯერობით არ არის ულტიმატუმი, მაგრამ სასურველია, რომ პირველი-მეექვსე კლასის პედაგოგებმა იცოდნენ ქართული. ამ საკითხზე არ არის სპეციალური ინსტრუქციები, მაგრამ არსებობს კურსები და ჩვენი პედაგოგები მთელი ზაფხულის განმავლობაში შეისწავლიან ქართულ ენას’’.

რა შედეგს გამოიღებს არნიშნული კურსები და გახდება თუ არა ის დათხოვნის მიზეზი, მიმდინარე წლის სექტემბერში გაირკვევა.

[ქრისტინა მარაბიანი, ახალქალაქი]