აპრილის თვიდან პედაგოგები გაზრდილ ხელფასს მიიღებენ

განათლებისა და მეცნიერების სამინისტროს ინფორმაციით, ხელფასის ზრდა პედაგოგთა სტაჟსა და აკადემიურ ხარისხზეა დამოკიდებული. აპრილის თვიდან მასწავლებლის საბაზო ანაზღაურება 50 ლარით გაიზრდება და 405 ლარი გახდება.

თუ პედაგოგს უფროსი მასწავლებლის სტატუსი აქვს, მაშინ მის საბაზისო ხელფასს 405 ლარს, სრული დატვირთვის შემთხვევაში 180 ლარი დაემატება.

წამყვანი მასწავლებლის სტატუსის მქონეთათვის, სრული დატვირთვის შემთხვევაში, დანამატი 270 ლარით განისაზღვრება.

მენტორის სტატუსის მქონეთათვის კი სრული დატვირთვისას, დანამატი 400 ლარი იქნება.



სამინისტროს ინფორმაციით, აპრილის ბოლოს პედაგოგები უკვე გაზრდილ ხელფასს მიიღებენ.

რაც შეეხება მაღალმთიან დასახლებებში მცხოვრებ მასწავლებლებს, უწყებაში განმარტავენ, რომ მათთვის 7 მილიონი ლარი ცალკეა გამოყოფილი და საბაზო ხელფასზე ისინი 35%–იან სახელფასო დანამატს მიიღებენ.

შეგახსენებთ, რომ პედაგოგთა ანაზღაურების სამეტაპიანი ზრდის პირველი ეტაპი 2015 წლის სექტემბერში განხორციელდა. საბაზისო ხელფასი 17%-ით გაიზარდა. მესამე ეტაპი კი 2017 წლის იანვრიდან იწყება.

[თაკო ფეიქრიშვილი, ახალციხე]