ახალციხეში ახლადდამონტაჟებულ ლიფტში მობინადრეები გაიჭედნენ

დღეს, 17 ივლისს, თამარაშვილის N2–ში, ე.წ. რვასართულიანების სადარბაზოში დამონტაჟებული ლიფტი გაჩერდა და რამდენიმე წუთის განმავლობაში, შიგ მყოფი პირები დახმარებას ელოდებოდნენ.

კორპუსის სადარბაზოში ამ ლიფტის მონტაჟი გუშინ, 16 ივლისს დასრულდა. აქ სამუშოებს შპს "ტექსერვის +" აწარმოებს. ადგილზე, ლიფტის შესაკეთებლად და გაჭედილი მობინადრეების დასახმარებლად, კომპანიის წარმომადგენლები მივიდნენ. როგორც მათ განმარტეს, ლიფტი ექსპლუატაციაში შესული იყო, მაგრამ მობინადრეებმა არასწორად მოიხმარეს.

ახალციხის მუნიციპალიტეტის მერიის საზოგადოების სამსახურის ინფორმაციით, „ლიფტი იმიტომ გაიჭედა, რომ მცხოვრებლებმა კარის გაღება შიგნიდან სცადეს და სართულებს შორის გაჩერდნენ“.

ახალციხეში, თამარაშვილის ქუჩა N2-ში მდებარე მრავალბინიან საცხოვრებელ სახლში ლიფტების მონტაჟი სამ სადარბაზოში მიმდინარეობს.

კორპუსის ერთ სადარბაზოში უკვე დამონტაჟდა ლიფტი, დანარჩენებში კი სამუშაოები ახლაც მიმდინარეობს.
სამუშაოები ადგილობრივი ბიუჯეტიდან გამოყოფილი თანხით დაფინანსდა.

[თორნიკე ზაზაძე, ახალციხე]