ტყის მდგრადი მართვის უზრუნველყოფა - ეკოლოგიური, სოციალური და ეკონომიკური ასპექტების გათვალისწინებით, ეფექტური დიალოგის დაწყება და კოორდინაციის ხელშეწყობა ცენტრსა და რეგიონს,საზოგადოებასა და ხელისუფლებას, საქართველოსა და ევროკავშირს შორის - ამ თემებზე იმსჯელეს დღეს ღია გარემოსდაცვითი სამოქალაქო ინიციატივის (OECL)რეგიონალურმა საკოორდინაციო ჯგუფმა.
სამუშაო შეხვედრას სამცხე-ჯავახეთის მხარის არასამთავრობო ორგანიზაციები, ამ სფეროში მომუშავე კერძო სექტორისა და საინფორმაცო საშუალებების წარმომადგენლები და აქტიური მოქალაქეები ესწრებოდნენ.
შეხვედრა „ახალციხის დემოკრატიული ჩართულობის“ ცენტრში OECL-ის ორგანიზებითა და ცენტრის მხარდაჭერით გაიმართა.
OECI–ის სამცხე–ჯავახეთის კოორდინატორის, ხათუნა ხმალაძის განცხადებით, სატყეო სფეროში დაგროვილი პრობლემების გადაჭრა ყველა დაინტერესებული მხარის მჭიდრო თანამშრომლობას მოითხოვს: „დღევანდელი შეხვედრის მიზანი სწორედ ამ თანამშრომლობის მექანიზმების განვითარებაა, რაც საზოგადოებას მდგრადი სატყეო პოლიტიკის ფორმულირებაში, მართვასა და ზედამხედველობაში
ეფექტური მონაწილეობის შესაძლებლობას მისცემს, გადაწყვეტილების მიღების პროცესში ყველა მოქალაქემ თავისი სიტყვა უნდა თქვას. ღია გარემოსდაცვითი სამოქალაქო ინიციატივის (OECI) ფარგლებში შექმნილია ადგილობრივი, რეგიონალური საკოორდინაციო ჯგუფები მოსახლეობის, სპეციალისტების, სამთავრობო და არასამთავრობო ორგანიზაციების,მედიისა და ბიზნეს სექტორის მონაწილეობით; ანალოგიური სამუშაო ჯგუფი შეიქმნა ცენტრალურ დონეზე სამინისტროების, საერთაშორისო ექსპერტების, საპარლამენტო კომიტეტებისა და დაინტერესებული მხარეების წარმომადგენლების მონაწილეობით; ჩამოყალიბდა ექსპერტთა
მობილური სამუშაო ჯგუფი დარგის სპეციალისტების, სამეცნიერო და საერთაშორისო ორგანიზაციების წარმომადგენლების მონაწილეობით; ჩვენ ვთანამშრომლობთ აღნიშულ სამუშაო ჯგუფებთან და ყველა დონეზე განვიხილავთ სატყეო სექტორში არსებულ პრობლემებს, მუშავდება შესაბამისი რეკომენდაციები".
სატყეო სექტორში არსებულ პრობლემეზე მსჯელობისას ძირითად პრობლემად ხე-ტყის უკანონო ჩეხვა დასახელდა.
- ’იმაზე ათჯერ მეტი ხე იჭრება, ვიდრე ოფიციალურადაა გაწერილი. მეორეს მხრივ, კი რა უნდა ქნას მოქალაქემ ზამთარში?! მითუმეტეს იმ სოფლის მცხოვრებლებმა, რომელთაც ბუნებრივი აირი ჯერ არ აქვთ’, - განაცხადა სამცხე-ჯავახეთის სახელმწიფო სასწავლო უნივერსიტეტის პროფესორმა, ეკონომისტმა გიორგი ბუცხრიკიძემ.
იურიდიული დახმარების სამსახურის სამცხე-ჯავახეთის ბიუროს უფროსის დავით ზარიძის თქმით, რეგიონში დანაშაულის ერთი მესამედი სწორედ უკანონო ჩეხვაზე მოდის: ’ბოლო რამდენიმე თვეა მსგავსი საქმე აღარ შემოსულა. შესაძლოა, ეს ’გარემოს დაცვის საგამოძიებო სამსახურის’ გაუქმებამ გამოიწვია. ეს სამსახური აკონტროლებდა ხე-ტყის უკანონო ჩეხვას’.
ხათუნა ხმალაძე ამბობს რომ, ამ პრობლემების გამოსასწორებლად საზოგადოება აქტიურად უნდა ჩაერთოს, ახალ ხელისუფლების ხედვა პოზიტიურია, რაც გამოიხატება იმაში რომ მიმდინარეობს გარემოს დაცვის სამინისტროს უფლებამოსილებისა და შესაძლებლობების გაძლიერება; ერთ-ერთ პრიორიტეტად განიხილება ეფექტიანიმექანიზმების შექმნა გარემოს მდგომარეობის შესახებ მოსახლეობის სრულად ინფორმირებისა და გარემოსდაცვით სფეროში გადაწყვეტილებების მიღების პროცესში მათი მონაწილეობის უზრუნველყოფა;
CENN კავკასიის გარემოსდაცვითი არასამთავრობო ორგანიზაციების ქსელი, ავსტრიის განვითარების სააგენტოს (ADA) -ს მხარდაჭერით
ანხორციელებს პროექტს „ტყის მდგრადი მართვა საქართველოში“, პროექტის ფარგლებში ჩამოყალიბდა და ვითარდება ღია გარემოსდაცვითი სამოქალაქო ინიციატივა OOECI, სამოქალაქო ინიციატივა საქართველოს 7 რეგიონში ხორციელდება, მათ შორის სამცხე-ჯავახეთშიც. ინიციატივის მიზანია, საქართველოში ტყის მდგრადი მართვის უზრუნველყოფა - ეკოლოგიური, სოციალური და ეკონომიკური ასპექტების გათვალისწინებით, ეფექტური დიალოგის დაწყება და კოორდინაციის ხელშეწყობა ცენტრსა და რეგიონს, საზოგადოებასა და ხელისუფლებას, საქართველოსა და ევროკავშირს შორის;
[ნინო ზედგინიძე, ახალციხე]