ახალციხეში სატყეო სექტორში არსებულ რეფორმებზე ისაუბრეს

კავკასიის გარემოსდაცვითი არასამთავრობო ორგანიზაციების ქსელი, საქართველოს გარემოს დაცვის, ენერგეტიკისა და ბუნებრივი რესურსების, რეგიონული განვითარებისა და ინფრასტრუქტურის სამინისტროებთან ერთად და ღია გარემოსდაცვის სამოქალაქო ინიციატივასთან ერთად სატყეო სექტორში მიმდინარე რეფორმებზე საზოგადოების ინფორმირებას და ადგილობრივი პრობლემატიკის შეფასებების პროგრამას ტყის მართვის დარგში ახორციელებს. აღნიშნული ინიციატივის მიზანია სატყეო სექტორში მიმდინარე რეფორმებზე ყველა დაინტერესებულ მხარისთვის ინფორმაციის მიწოდება, ასევე სოციოლოგიური კვლევის საფუძველზე ერთიანი სურათის შექმნა. რაც მომავალში გადაწყვეტილებების მიღების პროცესში იქნება გამოყენებული.

დღევანდელ შეხვედრაზე მონაწიელობას მუნიციპალიტეტში არსებული შესაბამისი სამსახურების წარმომადგენლები და ტერიტორიული ორგანოს რწმუნებულები იღებენ.

”გვინდა, რომ ჩვენს პროექტში ადგილობრივი მოსახლეობა და ტერიტორიული ორგანოს რწმუნებულები იყვნენ ჩართული და უფრო მეტად ინფორმირებულები იყვნენ. არ გვინდა სიტყვები იყოს, ამიტომ რეალურად ვცდილობთ ისეთი მექანიზმები შევიმუშაოთ, რომ მონაწიელობა ყველამ მიიღოს”, - ამბობს კავკასიის გარემოსდაცვითი არასამთავრობო ორგანიზაციების ქსელის გარემოსდაცვითი პროექტების კოორდინატორი რეზო გეთიაშვილი.

მისივე თქმით, საქართველოს შვიდ რეგიონში სოციოლოგიურ კვლევებს ჩაატარებენ, რომელიც 2 400-მდე სოფელს და 43 ქალაქს მოიცავს.

”სოციოლოგიური კვლევები რეგიონში ადგილობრივ პრობლემებს და აქტუალურ თემებს გვიჩვენებს. რაც დაგვეხმარება მომავალში სწორად მივიღოთ გადაწყვეტილებები” – ამბობს რეზო გეთიაშვილი.

მსგავსი სახის გაცნობითი შეხვედრები საქართველოს სხვადასხვა რეგიონებშიც გაიმართება.
”მსგავსი შეხვედრები ჩვენს რეგიონის ყველა მუნიციპალიტეტში ჩატარდება, პირველი შეხვედრა სავარაუდოდ ადიგენში გაიმართება”, - ამბობს ღია გარემოსდაცვითი სამოქალაქო ინიციატივის კოორდინატორი სამცხე-ჯავახეთის რეგიონში ხათუნა ხმალაძე.

ამავე პროექტის ფარგლებში კავკასიის გარემოსდაცვითი არასამთავრობო ორგანიზაციების ქსელის (CENN) და გარემოს დაცვის სამინისტრო, ავსტრიის განვითარების სააგენტოს (ADA) მხარდაჭერით, სამცხე-ჯავახეთის მხარეში გამწვანების აქციას ”დარგე შენი ხე და იზრუნე მასზე” გამართავს.

ნერგები რაბათისა და ტბის მიმდებარე ტერიტორიებზე დაირგვება. გამწვანების აქციაში მონაწილეობას გარემოს დაცვის მინისტრის მოადგილე, ადგილობრივი ხელისუფლების წარმომადგენლები, მოსწავლეები და სტუდენტები მიიღებენ .

[ნუკა სტეფნაძე, ახალციხე]