აღნიშნული კვლევა, პროექტის „ტყის მდგრადი მართვა საქართველოში“ ფარგლებში, 2013 წლის გაზაფხულზე ჩატარდა. კვლევა 2012 წლამდე პერიოდს მოიცავდა. კვლევის მიზანი იყო ტყეების მართვასთან დაკავშირებული პრობლემების იდენტიფიცირება და შესწავლა; სატყეო რესურსებზე მოთხოვნისა და საჭიროებების დადგენა და ტყეების მართვასთან დაკავშირებული პრობლემების ადგილობრივი მოსახლეობის ცხოვრების სხვადასხვა ასპექტზე ზეგავლენის შესწავლა.
კვლევაში რეგიონის მცხოვრებლები მონაწილეობდნენ. სამცხე-ჯავახეთის ექვსივე მუნიციპალიტეტში 434 რესპონდენტი გამოიკითხა. კვლევა მიმდინარე წლის მარტი-აპრილი-მაისის თვეებში მიმდინარეობდა.
„ყველა სამიზნე რეგიონში, ადგილობრივი მოსახლეობის აზრით, ტყეების მდგომარეობის დინამიკა უარყოფითია და წლების მიხედვით უარესდება. ტყეების ადგილს ბუჩქნარი და ბარდი იკავებს, ტყეებიდან ქრება ადრე გავრცელებული ცხოველები, სატყეო გზების მდგომარეობა გაუარესებულია, ფერდობები ჩამორეცხილი და დამეწყრილია. მნიშვნელოვანია, რომ ტყეების განადგურების შედეგად სოფლებს სასმელი წყლის პრობლემები ექმენებათ, გაზრდილია ღვარცოფებისა და წყალმოვარდნების რისკი“, - ამბობს ღია გარემოსდაცვითი სამოქალაქო ინიციატივის კოორდინატორი სამცხე-ჯავახეთში ხათუნა ხმალაძე და აქვე ამატებს, რომ ტყის მდგომარეობის გაუარესების მიზეზი არაერთია: „ეს არის კანონმდებლობის ხარვეზი, ასევე მართვის კუთხით არის პრობლემები, მნიშვნელოვანია მიდგომები საზოგადოების მხრიდან, საჭიროა მოსახლეობის თვითშეგნების ამაღლება, რათა გავუფრთხილდეთ რესურსს და რაციონალურად ვისარგებლოთ“.
კავკასიის გარემოსდაცვითი არასამთავრობო ორგანიზაციების ქსელის (CENN) კვლევაში აქტიური მონაწილეობა ადგილობრივი თვითმმართველობის წარმომადგენლებმა მიიღეს. თითოეულ სოფელში კვლევის ჩატარება ტერიტორიული ორგანოს რწმუნებულების დახმარებით მოხდა.
„რწმუნებულებს მივაწოდეთ ინფორმაცია, დაურიგდათ კითხვარი და სოფლებში აწარმოებდნენ გამოკითხვას. მოსახლეობის მხრიდან ინტერესი მაღალი იყო და გამოკითხვაში მონაწილოებას თავისი სურვილით იღებდა“,-ამბობს ასპინძის მუნიციპალიტეტის გამგებლის მოადგილე იულია მაისურაძე.
სამცხე-ჯავახეთში გამოკითხული მოსახლეობის აზრს, ტყის დაცვის კუთხით, არ ეთანხმება სამცხე-ჯავახეთის სატყეო სამსახურის უფროსი მეტყევე ლევან თედიაშვილი.
„მდგომარეობა ამ მხრივ გაუარესებულია.კანონმდებლობაში მიმდინარეობს ცვლილებების შეტანა. უფრო დაიხვეწება და მოქნილი გახდება. იქნება მოსახლეობის ინტერესები გათვალისწინებული. გაიოლდება ხე-ტყის მოპოვება და რათქმა უნდა გამკაცრდება კანონი ხე-ტყის უკანონოდ მოპოვებაზე“, - ამბობს იგი.
კვლევა ჩატარდა აჭარის, კახეთის, მცხეთა-მთიანეთის, რაჭა-ლეჩხუმი-ქვემო სვანეთის, სამეგრელო -ზემო სვანეთის, სამცხე-ჯავახეთისა და ქვემო ქართლის რეგიონების ყველა მუნიციპალიტეტში. ჯამში კვლევა 1.933 სოფელში ჩატარდა, გამოიკითხა ამდენივე რესპოდენტი.
კვლევის შედეგების პრეზენტაცია დღეს, 23 სექტემბერს, ახალციხის "დემოკრატიული ჩართულობის ცენტრში" შედგა. მას რეგიონის ექვსივე მუნიციპალიტეტის თვითმმართველობის წარმომადგენლები, სამცხე-ჯავახეთის სატყეო სამსახურისა და არასამთავრობო ორგანიზაციის წარმომადგელები დაესწრნენ.
[თინათინ ზაზაძე, ახალციხე]
FM97.5 / LIVE
