არჩევნების კვალი ახალციხეში – ვინ უნდა გაასუფთაოს ქალაქი ‘პლაკატებისგან’[Photo]

2016 წლის საპარლამენტო და ახალციხის მერის რიგგარეშე არჩევნების დასრულებიდან 17 დღე გავიდა, თუმცა ახალციხის ქუჩებში სხვადასხვა პოლიტიკური სუბიექტის საარჩევნო პლაკატს ჯერ ისევ ბევრგან შეხვდებით.

„პლაკატების“ უმეტესი ნაწილი შენობების კედლებზე, ბილბორდებზე, ავტოფარეხებზე და ღობეებზე რჩება; ნაწილი ჩამოხეულია, თუმცა წებო, რითაც გააკრეს, დარჩენილია.

ახალციხეში, საარჩევნო მასალებს შორის, „ქართული ოცნებისა“ და „ერთიანი ნაციონალური მოძრაობის“ მაჟორიტარი დეპუტატობისა და მერობის კანდიდატების სააგიტაციო მასალები გვხვდება. ასევე, ჩანს პაატა ბურჭულაძის საარჩევნო ბლოკისა და „თავისუფალი დემოკრატების“.

„ნაციონალური მოძრაობის“ სამცხე–ჯავახეთის კოორდინატორის გელა დემეტრაძის განმარტებით, გაასუფთავებენ თუ არა სააგიტაციო მასალებისგან ქალაქს, ჯერ გადაწყვეტილი არ აქვთ: „ამაზე არ გვიმსჯელია. შესაძლებელია გავწმინდოთ. წინა არჩევნებზე სააგიტაციო მასალებისგან შენობებს ხან ვწმენდდით, ხან არა“.

„ქართული ოცნების“ შტაბში აცხადებენ, რომ სააგიტაციო მასალების ჩამოხსნას უახლოეს დღეებში დაიწყებენ.

„თავისუფალი დემოკრატების“ ყოფილი მაჟორიტარი დეპუტატი ახალციხე–ადიგენის ოლქში შალვა გოგოლაძე ფიქრობს, რომ წინასაარჩევნოდ იმდენად ცოტა სააგიტაციო მასალა გააკრეს ქუჩებში, შესაძლებელია აღარც კი იყოს გასასუფთავებელი: „ვალდებულება გვაქვს აღებული, თუ სადმე გვაქვს დარჩენილი ჩამოვხსნით“.

რამდენიმე დღეში დაიწყებს ქალაქის საკუთარი „პლაკატების“ გასუფთავებას“ „ბურჭულაძის“ პარტიის წარმომადგენელი ივანე გვარამაძე.
საარჩევნო კოდესის 46–ე მუხლის მერვე ნაწილის თანახმად, საარჩევნო სუბიექტი ვალდებულია არჩევნების საბოლოო შედეგების ოფიციალურად გამოქვეყნებიდან 15 დღის ვადაში სააგიტაციო მასალის ჩამოხსნა უზრუნველყოს;

ცენტრალურმა საარჩევნო კომისიამ 2016 წლის პარლამენტის არჩევნების საბოლოო შედეგები 16 ნოემბერს შეაჯამა. ამ დღიდან 15 დღის ვადაში უნდა ჩამოხსნან საარჩევნო სუბიექტებმა სააგიტაციო მასალა.

წინააღმდეგ შემთხვევაში, როგორც ამას საარჩევნო კოდექსის 46–ე მუხლში ვკითხულობთ: საარჩევნო სუბიექტებს საქართველოს კანონმდებლობით გათვალისწინებული პასუხისმგებლობა დაეკისრებათ.

საიას გორის ოფისის ხელმძღვანელის ქეთი ბებიაშვილის განმარტებით, ვალდებულების შეუსრულებლობის გამო საარჩევნო სუბიექტს შესაძლებელია ქალაქის იერსახის დამახინჯებისთვის ადმინიტრაციული სამართალდარღვევის კოდექსის შესაბამისად, ჯარიმა დააკისროს: „კონკრეტული სანქცია სამწუხაროდ კანონში გაწერილი არ არის, რაც ქმნის ამ პრობლემას. საარჩევნო პერიოდის შემდეგ საარჩევნო სუბიექტები აღარ ხსნიან სააგიტაციო მასალებს, იგნორირებას უკეთებენ, თუმცა ვალდებული არიან“.

მისივე თქმით, ამ შემთხვევაში ქალაქის მერიას შეუძლია იერსახის დამახინჯებისთვის კონკრეტული სუბიექტები დააჯარიმოს.
ახალციხის მერიის ზედამხედველობის სამსახურის უფროსის ნაირა სამსონიძის განმარტებით, მერიამ უნდა მიუთითოს საარჩევნო სუბიექტებს დაკისრებული ვალდებულებების შესასრულებლად, თუმცა მათ ვადა 15 დღე, 1 დეკემბრამდე აქვთ.











[თინათინ ზაზაძე, ახალციხე]