ბორჯომში საარჩევნო შეხვედრებისა და პლაკატების გასაკრავი ადგილები გამოყეს

ამ საკითხებზე ბორჯომის საკრებულოს დეპუტატებმა დღეს, 17 ივნისს, საკრებულოს სხდომაზე იმსჯელეს.

2016 წლის 8 ოქტომბრის საპარლამენტო არჩევნებისთვის, პოლიტიკურ პარტიებსა და საარჩევნო სუბიექტებს ამომრჩეველთან შეხვედრების ჩატარება სოფლებში კულტურის სახლებში, კლუბებსა და რიტუალების სახლებში შეეძლებათ. ქალაქ ბორჯომში კი შეხვედრებისთვის ბორჯომის კულტურისა და ხელოვნების ცენტრი და ბორჯომის ზაქარია ფალიაშვილის სახელობის სამუსიკო სკოლაა განსაზღვრული.

რაც შეეხება სააგიტაციო მასალების განთავსებას, პლაკატების გაკვრა დასაშვებია:

► საავტომობილო გზების გასწვრივ მდებარე ღამის განათების ბოძებზე;
► შენობა-ნაგებობებსა და სხვა ობიექტებზე, მათი მესაკუთრეების ან მფლობელების წერილობითი თანხმობის შემთხვევაში;
► სოფლებში, კლუბების, რიტუალების სახლებისა და მუსიკალური სკოლების შენობებზე.

საარჩევნო მასალების გაკვრა აკრძალულია:

► საკულტო ნაგებობებზე ;
► კულტურული მემკვიდრეობის ძეგლის სტატუსის მქონე შენობა-ნაგებობებზე;
► პოლიციის კუთვნილი შენობების ინტერიერში და ექსტერიერზე;
► საგზაო ნიშნებზე;
► ქალაქ ბორჯომის შესასვლელთან მდებარე ქვის სტელაზე;
► შენობების ინტერიერსა და ექსტერიერში, რომლებშიც განთავსებულია:
• სახელმწიფო ხელისუფლების ორგანოები
• ადგილობრივი თვითმმართველობის ორგანოები
• სასამართლო;
• პროკურატურა;

რაც შეეხება გაკრული საარჩევნო მასალების ჩამოხსნას, შესაბამისი საარჩევნო სუბიექტი ვალდებულია არჩევნების საბოლოო შედეგების ოფიციალურად გამოქვეყნებიდან 15 დღის ვადაში უზრუნველყოს სააგიტაციო მასალის ჩამოხსნა. წინააღმდეგ შემთხვევაში მას დაეკისრება საქართველოს კანონმდებლობით გათვალისწინებული პასუხისმგებლობა.

[ლუბა გიორგაძე, ბორჯომი]