ივერიელის ქუჩის მცხოვრებლები გზაზე სიჩქარის შემზღუდველების გაკეთებას ითხოვენ

მოსახლეობა ამბობს, რომ ქუჩაზე გადასვლა ყველაზე მეტად საღამოს საათებშია სახიფათო. ადგილობრივები მანქანების სწრაფი მოძრაობის გამო სიჩქარის შემზღუდველი გადასასვლელების გაკეთებას ითხოვენ. აღნიშნული დასახლების მცხოვრებლები ამბობენ, რომ უახლოეს დღეებში გამგეობაში განცხადების შეტანას გეგმავენ.

- ”მსგავსი რამ ზედა ქუაზე უკვე გააკეთეს. ვითხოვთ ანალოგიური გადასასვლელი აქაც გაკეთდეს. შარშან ამ გზაზე ახალგაზრდა ბიჭი დაიღუპა. მსგავსი ფაქტი რომ არ განმეორდეს, რაიმე ზომების მიღებაა საჭირო”, - ამბობს ნინო ლომიძე.

ახალციხის მუნიციპალიტეტის გამგეობაში განმარტავენ, რომ ქალაქში უსაფრთხო და მოწესრიგებული მოძრაობისთვის საკმაოდ ბევრი გაკეთდა. რაც შეეხება შიდა გზებს, სიჩქარის შემზღუდველების დამონტაჟება გათვალისწინებული არ არის.

კითხვაზე - რა შეიძლება გააკეთოს მუნიციპალიტეტის გამგეობამ აღნიშნული პრობლემის მოსაგვარებლად ან ვის უნდა მიმართოს ივერიელის ქუჩის მოსახლეობამ, ახალციხის მუნიციპალიტეტის გამგებელმა გელა დემეტრაძემ გუშინ საღამოს, მუნიციპალიტეტის ფეისბუქის ოფიციალურ გვერდზე, ონლაინ კონფერენციის დროს, ასეთი პასუხი გაგვცა: ”ივერიელის ქუჩაზე უკვე გაკეთდა სიჩქარის შემზღუდველები, შეგიძლიათ ახვიდეთ და ნახოთ”.

სიჩქარის შემზღუდველი ივერიელის ქუჩის მხოლოდ ზედა ნაწილშია გაკეთებული, ხოლო ქვედა მხარეს კი სწრაფ მოძრაობას არაფერი აფერხებს.

[თამარ თოთაძე, ახალციხე]