სოფელ ჩუნჩხაში სკოლა აშენდება

სოფელ ჩუნჩხაში სკოლის ასაშენებლად მუნიციპალური განვითარების ფონდმა, საპროექტო და სამშენებლო სამუშაოებისათვის ტენდერი, შვიდ ივნისს გამოაცხადა.

საპროექტო დოკუმენტაციის მიხედვით საჯარო სკოლის შენობა გათვლილი უნდა იყოს 90 მოსწავლეზე და უნდა მოიცავდეს შემდეგ სივრცეებს: 9 საკლასო ოთახი, 3 კაბინეტი და 1 ლაბორატორია; დირექტორის კაბინეტი, კანცელარია, ბუღალტერია-არქივით; სამასწავლებლო; სასწავლო ნაწილის ოთახი; ბიბლიოთეკა წიგნ-საცავით; ექიმის კაბინეტი; მანდატურის/დაცვის ოთახი; სანიტარული კვანძის ბლოკები მოსწავლეებისათვის, ადმინისტრაციისათვის და შ.შ.მ პირებისათვის; კვების ბლოკი-ბუფეტი; დამლაგებლის ოთახი სველი წერტილით და სადეზინფექციო სათავსით; ფოიე გარდერობით, დერეფანი; ღია ხელოვნურ საფარიანი კომბინირებული სპორტული მოედანი.

სკოლის მშენებლობისათვის სახელმწიფო ბიუჯეტიდან 1 905 230 ლარი დაიხარჯება.

ახალქალაქის, სოფელ ჩუნჩხაში სკოლის შენობა 2016 წლის პირველ ნოემბერს დაიწვა მაშინ, როდესაც საგაკვეთილო პროცესი მიმდინარეობდა, ადგილობრივებმა მოსწავლეების და მასწავლებლების გამოყვანა დროულად შეძლეს. მოსწავლეები ამ დრომდე სოფლის ადმინისტრაციულ შენობაში სწავლობენ.

[ლუბა გიორგაძე, ახალქალაქი]