ბრძოლა მოსწავლეებისთვის

ადიგენის მუნიციპალიტეტის სოფელ ბენარის საჯარო სკოლაში მოსწავლეები არამხოლოდ ბენარიდან, არამედ მეზობელი, ახლომდებარე სოფლებიდანაც დადიან. ეს სოფლებია: უნწა, შოლავერი და დასახლება ემტეესი.

ბენარის საჯარო სკოლის პედაგოგები ამბობენ, რომ მას შემდეგ, რაც განათლების სამინისტრომ შორი მანძილიდან მოსიარულე ბავშვებისთვის სასკოლო ავტობუსების გამოყოფა გადაწყვიტა, ხევაშენის სკოლის დირექტორმა გადაწყვიტა ინიციატივა სასიკეთოდ გამოეყენებინა და სამინისტრო შეცდომაში შეიყვანა.

”სამინისტოს წერილით მიმართა, რადგან უნწის დაწყებითი სკოლა ჩემთან არის მიწერილი, მინდა იმ ბავშვებმა, ვინც ამ სკოლას ამთავრებენ, ხევაშენში იარონ და ტრანსპორტი გამოგვიყეთო. შეაგროვა ხელმოწერებიც და ჩაიტანა სამინისტროში”, - ამბობს ბენარის საჯარო სკოლის დირექტორი სვეტლანა ბოჩიკაშვილი.

ბენარის სკოლის დირექტორი კობა კუბლაშვილი ამბობს, რომ ხევაშენის სკოლამ სამინისტროს არასწორი ინფორმაცია მიაწოდა სოფლებს შორის არსებულ მანძილზეც.

“ხევაშენის სკოლის დირექტრომა მოიტყუა თითქოს სოფელ უნწიდან მის სკოლაში 13 მოსწავლე დადის. ასევე, გაყალბებით, სკოლებს შორის მანძილი თავის სასიკეთოდ ჩაწერა. სინამდვილეში, სოფელ უნწიდან ბენარის სკოლამდე ორი კილომეტრია, ხოლო ხევაშნამდე ექვსი”, - ამბობს კუბლაშვილი.

ბენარის სკოლის პედაგოგები ხევაშენის სკოლის დირექტორს მოსწავლებზე ზეწოლაშიც ადანაშაულებენ. ისინი ამბობენ, რომ დირექტორმა კრება ჩაატარა და მოსწავლეებსა და პედაგოგებს დაემუქრა, თუ ხევაშენის სკოლაში არ გადავიდოდნენ, სკოლას არ მიხედავდა და არ გაარემონტებდა (შეგახსენებთ, უნწის სკოლა ხევაშენის სკოლაზეა მიწერილი).



“რამდენჯერმე გადაიბირეს ბავშვები, მაგრამ მაინც უკან დაბრუნდნენ. ის მოსწავლეები, რომლებიც იქ სწავლობდნენ, ამბობენ, კვირაში ორი დღე დავდიოდით სკოლაში, დირექტორი გვეუბნებოდა, ოღონდ აქედან არ წახვიდეთ და ყოველდღე ნუ ივლითო”, - ამბობს პედაგოგი ნინო ფიცხელაური.

პრივილეგირებული ხევაშენი?!

ბენარის სკოლაში ირწმუნებიან, რომ ხევაშენის სკოლას ადიგენის მუნიციპალიტეტის ადგილობრივი ხელისუფლება მფარველობს. ამდენს ამიტომ ბედავენ.

ადიგენის მუნიციპალიტეტის საკრებულოს თავმჯდომარე ხევაშენიდანაა. თემის რწმუნებული, რომელშიც ხუთი სოფელი შედის (მათ შორის ბენარაც), ასევე ხევაშენიდანაა.

”არჩევნებზე კომისიის თავმჯდომარეც და მოადგილეც ხევაშენიდან იყვნენ. საერთო ჭურჭელი იყო ბენარის რიტუალების სახლში და ისიც ხევაშენში გადაიტანეს, ჩვენ გვაქირავებენ ჩვენი ფულით შეძენილს. ხევაშენში განათებები კეთდება, ჩვენთან კი მხოლოდ ცენტრალურ გზაზეა. გზებს არ ექცევა ყურადღება. საკრებულო გამოკეტილია და არჩევნების შემდეგ არ გაღებულა. მათგან აქვს ხევაშენის სკოლას ხელშეწყობა და მფარველობა. რატომ ეს ”ხევაშენიზაცია”?! - კითხულობს ბოჩიკაშვილი.

ხევაშენის სკოლის დირექტორის პასუხები ბრალდებებზე

ხევაშენის სკოლის დირექტორი ცისანა ობოლაძე ბრალდებებს უსაფუძვლოს და ცილისმწამებლურს უწოდებს

ობოლაძე ამბობს, რომ თავად წერილი არსად გაუგზავნია. საქართველოს განათლების სამინისტროდან დაუკავშირდნენ და კითხეს, ესაჭიროებოდა თუ არა სასკოლო ავტობუსი.

”თანხმობა განვაცახადე, რადგან ორი წელიწადია მშობლები მიწერენ განცხდებას, თუ ავტობუსი ივლის, ბავშვებს ხევაშენის სკოლაში გადმოვიყვანთო”, - ამბობს იგი და აქვე პირიქით, თავად ადანაშაულებს ბენარის სკოლის დირექტორს სიტყვიერ შეურაცხყოფაში, - დამირეკა, გამლანძღა და დამადანაშაულა, თითქოს დავწერე ტყული, რომ ჩემთან 13 ბავშვი დადის. მასწავლებლები დამეთანხმებიან, რომ ვერცერთი დირექტორი გააკეთებს იმას მშობლებთან, რაც ბენარის სკოლის დირექტორმა გააკეთა. შუყვანია ბავშვები და უთქვამს ვერსად ვერ გადახვალთ, ხევაშენში ავტობუსი მარტო წელს იქნება და მერე უკან აღარ მიგიღებთო”.

ობოლაძე ამბობს, რომ მშობელთა კრება ნამდვილად ჩაატარა, ოღონდ იმისთვის, რომ მშობლბისთვის მისი წინადადება გაეცნო: ”ბავშვებს და მშობლებს ავუხსენი, რომ თუ ბავშვები ოთხი კლასის შემდეგაც ჩემთან ივლიან, ვალდებული ვიქნები მათზე ვიზრუნო, სკოლა გავურემონტო, შემოვღობო და კომპიუტერული ტექნიკით მოვამარაგო. იმ შემთხვევაში, თუ მათი ბავშვები წავიდოდნენ სხვა სკოლაში და შესაბამისად, წაიღებდნენ ვაუჩერს, სკოლას არ ექნებოდა საშუალება და აკრედიტაცის გარეშე დარჩებოდა არამარტო უნწის, არამედ ხევაშენის სკოლაც. შევთავაზე, რომ თუ ოთხი კლასის შემდეგ ბენარაში უნდა იარონ, დაწერონ განცხადება და შეუერთდნენ ბენარას“.

ობოლაძის თქმით, სიცრუეა ისიც, რომ მას ადგილობრივი ხელისუფლება ეხმარება.

„ ეგ არის ცილისწამება. ემზარ ენდელაძეს (საკრებულოს თავმჯდომარე) არჩევნების წინა პერიოდში სოფელში მასწავლებლები შევხვდით და ვთხოვეთ ჩვენთვის მიწების მოსახნავად ტრაქტორი უქმე დღეებში გამოეყო, რადგან მთელი კვირის განმავლობაში არ გვეცალა. ისიც არ შეგვისრულა, როგორ ფიქრობთ ის ჩვენ გვეხმარება?!“- კითხულობს ობოლაშვილი.

რას ამბობენ მოსწავლეების მშობლები

სოფელ უნწაში მცხოვრები მოსწავლეების მშობლები ხევაშენის სკოლის დირექტორის მიმართ გავრელებულ ბრალდებას უსაფუძვლოს უწოდებენ. თუმცა, ამბობენ, რომ მათი სურვილია დაწყებითი სკოლა ბენარას შეუერთდეს და ოთხი კლასის დამთავრების შემდეგ მათმა შვილებმა სწავლა ბენარის სკოლაში განაგრძონ.

”ყოველთვის ვესწრები მშობელთა კრებას და მსავსი არაფერი თქმულა. ძალიან კარგი დირექტორია, ყველაფრით გვაქცევს ყურადღებას, საბუთები რომ სჭირდება, თვითონ მოდის, არ გვაწუხებს, რადგან შორი გზაა. მაგრამ, ჩვენ მაინც ბენარაში გვირჩევნია, რადგან ახლოსაა. ისეთი ცელქი შვილი მყავს, ავტობუსმაც რომ იაროს, ვერ ვენდობი. ყველა მშობელი ამ აზრისაა”, - ამბობს მარეხ ჭიღლაძე.

სკოლებს შორის გაჩენილი უთანხმოების შესახებ ინფორმაციას არ ფლობენ მუნიციპალიტეტის საკრებულოში.

”პირველად მესმის, ჩემთან არავინ მოსულა და არავის არაფერი უთქვამს. ვიცი, რომ უნწაში მხოლოდ დაწყებითი სკოლაა და მერე ბავშვები ბენარაში დადიან, რაც ჩემი აზრით უფრო მოსახერხებელია, რადგან ბენარის სკოლა შედარებით ახლოს ე.წ ბათუმის ხიდთან გადმოვიტანეთ. რაც შეეხება სხვა საკითხებს, რესურსცენტრის გადასაწყვეტია“,- გვითხრა ადიგენის მუნიციპალიტეტის საკრებულოს თავმჯდომარემ ემზარ ენდელაძემ.



ადიგენის საგანმანათლებლო რესურსცენტრშიც გვარწმუნებენ, რომ სკოლებს შორის არსეული უთანხმოების შესახებ ჩვენგან შეიტყვეს.
”ამ საკითხთან დაკავშირებით ინფორმაცია არ მაქვს. არავინ მოსულა, თქვენგან გავიგეთ. სკოლები საჯარო სამართლის იურიდიული პირები არიან და ჯობია მათთან გაარკვიოთ. რაც შეეხება ავტობუსების დანიშვნას, სამინისტროს ინიციატივაა და მგონი მისასალმებელია”, - გვითხრა რესურსცენტრის უფროსმა მარეხ დათიაშვილმა.

სკოლების მიწერის ისტორია

ხევაშენის საჯარო სკოლაში გარდა ხევაშენისა, მოსწავლეები ნაქურდევიდან და ვარხნიდან დადიან (ვარხნიდან რამდენიმე მოსწავლე დადის). სკოლაში ამჟამად 73 მოსწავლეა. რაც შეხება ბენარის საჯარო სკოლას, აქ 92 მოსწავლეა, ამათგან 32 სოფელ უნწიდან დადის.
სოფელ უნწის სკოლა ხევაშენის სკოლას 2005 წელს შეუერთდა. ხევაშენის სკოლის დირექტორი ამბობს, რომ მაშინ რესურსცენტრიდან მიღებულ შეთავაზებას დასთანხმდა.

„იმ დროს ბენარის სკოლა სოფლის ცენტრში მდებარეობდა. უნწიდან ბავშვების ნაწილი იქ, ნაწილი კი ხევაშენში დადიოდა. როდესაც მოგვივიდა შეთავაზება, თუ გვექნებოდა მზაობა და სურვილი, დავთანხმდით. ცხადია, მოთხოვნას ბენარის სკოლაშიც გააგზავნიდა. შემდეგ იყო მოთხოვნა, სკოლებს შორის მანძილის გარკვევის. უნწა, ბენარის ძველი სკოლიდან უფრო შორს იყო, ვიდრე ხევაშენის. საბოოლოდ, სამინისტრომ არჩევანი ჩვენზე გააკეთა“, - ამბობს ობოლაძე.

საწინააღმდეგოს ამტკიცბენ ბენარის სკოლაში. ისინი ამბობენ, რომ რადგან ხევაშენის სკოლა დახურვის პირას იყო, უნწის სკოლა ამიტომ მიუერთეს. ბენარის სკოლის პერსონალი უნწის სკოლის ისევ ბენარასთან შეერთებისთვის აპირებს ბრძოლას.
„წერილით მივმართეთ სამინისტროს, რომ მაშინდელი გადაწყვეტილება არაკანონიერია და უნწის სკოლა არ უნდა იყოს მიმაგრებული ხევაშენზე,“ - ამბობს სვეტლანა ბოჩიკაშვილი.


ვითარების გასარკვევად ”სამხრეთის კარიბჭე” საქართველოს განთლებისა და მეცნიერების სამინისტროს პრესცენტრს დაუკავშირდა. ”სამხრეთის კარიბჭემდე” სამინისტროდან პასუხი ბენარის სკოლამ მიიღო.

”წერილი მივიღეთ, სადაც წერია, რომ სპეციალური კომისია საკითხის უკვე სწავლობს და პასუხს სამ თვეში მივიღებთ”,-გვითხრა სატელეფონო საუბარში ბენარის საჯარო სკოლის დირექტორმა.

იგივე პასუხი გასცა განათლების სამინისტროს პრესსამსხურმა ”სამხრეთის კარიბჭესაც”.

”სკოლას უკვე გავუგზავნეთ წერილი, საკითხ სპეციალური კომისია სწავლობს. დანარჩენი მოგვანებით გაირკვევა”, - გვიპასუხა სამინისტროს პრესცენტრმა თიკო ფეიქრიშვილმა.

[თინათინ ზაზაძე, ადიგენი]