ბენარის სკოლის ეზოში მოსწავლეები სკვერს აკეთებენ

ამ აქტივობებით, ბენარის საჯარო სკოლა, ნიკო კეცხოველის სახელობის პრემიის მოპოვებას ცდილობს. გარემოსდაცვითი აქტივობები სკოლის ეკო კლუბის, ‘ოცხეს’ წევრებმა განახორციელეს. ახალგაზრდებმა სკოლის ეზოში ნიკო კეცხოველის სახელობის სკვერის გაშენება დაიწყეს და ნარგავები დარგეს.

მათი შემდეგი აქტივობა მყარი ნარჩენებისგან გარემოს დასუფთავება იყო. ეკოკლუბის თხუთმეტამდე წევრმა ადიგენისა და აბასთუმნის გზაგასაყარი ნარჩენებისგან გაწმინდა.

ნიკო კეცხოველის სახელობის კონკურსს ორგანიზაცია CENN, გარემოს დაცვის სამინისტროს პარტნიორობით ატარებს. კონკურსის ფარგლებში, საქართველოს სკოლებში შეიქმნა გუნდები, რომლებიც, პარტნიორ სახელმწიფო და საზოგადოებრივ ორგანიზაციებთან ერთად, ატარებენ დამოუკიდებელ მონიტორინგს და ახორციელებენ სხვადასხვა სახის გარემოსდაცვით აქტივობებს.

ახალგაზრდების აქტივობები სხვადასხვა ქულით ფასდება. ის გუნდები, რომლებიც ყველაზე მეტ ქულას დააგროვებენ, რეგიონულ ტურში გადავლენ. ამ ტურში გუნდის ლიდერებმა წლის აქტივობების შესახებ პრეზენტაციები უნდა გამართონ.

ჟიური თითო რეგიონიდან სამ გამარჯვებულს შეარჩევს. ფინალური ტური 2017 წლის 21 მარტს, ტყეების დაცვის საერთაშორისო დღეს გაიმართება.





[თაკო ფეიქრიშვილი, ადიგენი]