შშმ პირებმა და ბენარის სკოლის მოსწავლეებმა გამოფენა მოაწყეს

ღონისძიება დღეს, 26 ივლისს, სამოქალაქო განათლების პროგრამა "მომავლის თაობის" ფარგლებში გაიმართა.

აღნიშნული პროგრამის ბენარის სკოლის მოსწავლემ, ხატია ფეიქრიშვილმა 200 ლარიანი გრანტი მოიპოვა, რის შემდეგაც, საკუთარ კლასელებთან და "ტალიტა კუმის" ბენეფიციარებთან ერთად, ახალგაზრდებმა ხელნაკეთი ნივთები დაამზადეს – "მინდოდა მათ გვერდში დავდგომოდი, პროექტის საშუალებით მე და ჩემმა კლასელებმა მათი გახარება შევძელით, ერთად ვხატეთ და ნაკეთობები დავამზადეთ. მინდა, რომ არ ჰქონდეთ საზოგადოებაში გამოსვლის შიში და მეტი კომუნიკაცია დაამყარონ ხალხთან", – ამბობს ხატია ფეიქრიშვილი.

პროგრამა "მომავლის თაობას" სამცხე–ჯავახეთის საჯარო სკოლებში ახალციხის ახალგაზრდეული ცენტრი ახორციელებს.

ღონისძიებაზე ნახატებისა და ხელნაკეთი ნამუშევრების გამოფენის გარდა, მონაწილეებმა საცეკვაო და სასიმღერო ნომრებიც წარმოადგინეს.



[ავთო ინასარიძე, ახალციხე]