იმიტირებული არჩევნები ახალგაზრდა ამომრჩევლისთვის

დღეს, 19 ოქტომბერს, ახალციხის დემოკრატიული ჩართულობის ცენტრში შეხვედრას 15-მდე ახალგაზრდა დაესწრო.

საარჩევნო სისტემების განვითარების, რეფორმებისა და სწავლების ცენტრის წარმომადგენლებმა, ადგილობრივ ახალგაზრდებს არჩევნების დღესთან დაკავშირებული ყველა პროცედურა ჯერ პრეზენტაციის სახით გააცნეს. შემდეგ კი იმიტირებული არჩევნები გაიმართა, რომლის მონაწილეები თავად ახალგაზრდები იყვნენ.

როგორც სწავლების ცენტრის წარმომადგენელი თორნიკე გოგისვანიძე განმარტავს, მსგავსი სახის შეხვედრები ყველა იმ მაჟორიტარულ ოლქში ტარდება, სადაც საპარლამენტო არჩევნების მეორე ტური დაინიშნა. მისივე თქმით, არჩევნებთან დაკავშირებულ საკითხებში ახალგაზრდების ინფორმირებულობა მაღალია: „ჩვენ ვცდილობთ მოსახლეობას კენჭისყრის პროცედურებთან დაკავშირებით დეტალური ინფორმაცია მივაწოდოთ და ამ დღეს ისინი მომზადებულნი შეხვდნენ“.

შეხვედრაზე, ასევე ნაჩვენები იყო სწავლების ცენტრის მიერ მომზადებული სარეკლამო რგოლი საარჩევნო პროცედურების შესახებ. ორგანიზატორების განმარტებით, შეხვედრები 30 ოქტომბრამდე გაგრძელდება.

[ლუბა გიორგაძე, ახალციხე]