იმიტირებული არჩევნები ახალციხელი ახალგაზრდებისთვის

ახალგაზრდებს ცესკოს წარმომადგენლები ჯერ არჩევნების მნიშვნელობაზე და არჩევნების დღეს გასამართ პროცედურებზე ესაუბრნენ.

რა არის მარკირება, სამაგიდო სია, ვინ დახვდება საარჩევნო უბანში შესულ ამომრჩეველს, ვის რა ფუნქცია და ამავე დროს, უფლება აქვს, რისი გაკონტროლება შეუძლიათ და რას უკრძალავთ საარჩევნო კოდექსი საუბნო კომისიის წევრებს, რა არის გადასატაი ყუთი, ვის შეუძლია იგი მოითხოვოს, შეიძლება თუ არა ფოტო–ვიდეო გადაღება – ამ და სხვა თემებს განუმარტავდნენ ახალგაზრდებს ცესკოს წარმომადგენლები.

აუდიტორიის განსაკუთრებული ინტერესი, ფოტოგადაღებამ გამოიწვია. ერთ–ერთმა ახალგაზრდამ, 2012 წლის არჩევნებზე, გოგა ხაჩიძის მიერ გადაღებული და სოციალურ ქსელში გავრცელებული, უკვე შემოხაზული ბიულეტენი გაიხსენა და იკითხა, ჰქონდა თუ არა მას ამის გაკეთების უფლება და თუ ეს დარღვევა იყო, რა რეაგირება მოჰყვა ცესკოს მხრიდან. ფაქტს დისკუსია მოჰყვა. ახალგაზრდები ამბობდნენ, რომ თუ ეს დარღვევა იყო, სხვას რომ იგივე არ გაეკეთებინა, ცესკოს რაიმე სანქცია უნდა აემოქმედებინა. ცესკოს წარმომადგენლებმა კი მათ განუმარტეს, რომ იმ შემთხვევაში, თუ ამ ფაქტზე ცესკოში საჩივარი არ შევიდოდა, ცესკოს საქმის შესწავლის და რეაგირების საფუძველი არ ექნებოდა და ეს ასეც მოხდა.

ამომრჩეველთა საინფორმაციო კამპანია, რაც მიზნად ისახავს ელექტორატის საარჩევნო ცნობიერებისა და სამოქალაქო ჩართულობის დონის ამაღლების ხელშეწყობას საქართველოს პარლამენტის 2016 წლის 8 ოქტომბრის არჩევნებისთვის სწავლების ცენტრმა 2016 წლის 11 სექტემბრიდან დაიწყო. სწავლების ცენტრი ამომრჩეველთა საინფორმაციო კამპანიას 2016 წლის 17 ივნისს გამოცხადებული საგრანტო კონკურსის ფარგლებში დაფინანსებულ 41 არასამთავრობო ორგანიზაციასთან თანამშრომლობით ახორციელებს. მათ შორის, ერთ–ერთია "სამხრეთის კარიბჭეს" პროექტი სახელწოდებით "მე ვირჩევ". ამიტომ, შეხვედრა "სამხრეთის კარიბჭეს" ოფისში მოეწყო.



[sknews.ge]